Ўзбекистон Олий Мажлиси Қонунчилик палатаси биносининг фасадини реконструкция қилиш ва бинони таъмирлаш учун 16,54 млрд сўм (Марказий банкнинг 13 апрелдаги курсига кўра, қарийб $1,57 млн.) миқдорида маблағ ажратилиши режалаштирилган. Бу борадаги маълумотлар давлат харидлари порталида мавжуд бўлиб, бунга «Газета.uz» эътибор қаратди.
Порталда эълон қилинган маълумотларга мувофиқ, Қонунчилик палатасининг биносидан фойдаланиш бошқармаси 2021 йилнинг 10 февралида «Трест-12» АЖ билан шартнома имзолаган.
Амалга ошириладиган ишлар таҳминан 16,54 млрд сўмга баҳоланмоқда. Ушбу маблағлар давлат бюджетидан молиялаштирилади. Бажарилган ишларнинг ҳақиқий миқдори ва пудратчининг ҳаражатларига кўра, сарфланган маблағларга аниқлик киритилади.
Порталдаги мавжуд ҳужжатларга мувофиқ, Вазирлар Маҳкамасининг 2020 йил 29 ноябрдаги 505-ф-сонли буйруғига биноан лойиҳани тендерсиз амалга ошириш ва параллел равишда объектни лойиҳалаштиришга рухсат берилган. Ишларни 2021 йилнинг июнь ойида якунлаш режа қилинган.
Аввалроқ, «Газета.uz» Тошкентнинг Шароф Рашидов кўчасидаги (Мустақиллик майдони ёнида) маъмурий бино реконструкцияси ва фаввора остига автотураргоҳ қурилишига 431,5 млрд сўм сарфланиши мумкинлиги ҳақида ёзган эди. Ушбу лойиҳа пудратчиси сифатида ҳам акционерлари орасида қурилиш вазирининг ўғли ва рафиқаси бўлган «Трест-12» АЖ танланган.
Қонунчилик палатасининг бошқа давлат харидлари
2020 йилнинг 1 июлида Қонунчилик палатасининг биносидан фойдаланиш бошқармаси президент Администрациясининг қурилиш бирлашмаси (ПА ҚБ) билан шартнома имзолади. Келишув қуйи палата биносини капитал таъмирлаш, ҳудудни ободонлаштириш, ташқи ёритиш, мебель ва жиҳозлар билан таъминлашни назарда тутади (I босқич). Ишлар қиймати 15,1 млрд сўм этиб баҳоланган.
Бошқарма 2021 йилнинг 29 мартида Қонунчилик палатаси биносини иситиш, вентиляция, ҳаво совутиш ускуналарини ўрнатиш ва алоқа тизимларини мукаммал таъмирлаш учун ПА ҚБ билан яна бир шартномани тузган. Лойиҳа миқдори 47,7 млрд сўм этиб баҳоланган. Мазкур лот учун давлат харидлари сайтига юкланган ҳужжатлар бўм-бўш бўлиб чиқди.
