Европа комиссияси расмий вакили Дана Спинант жума куни Брюссель шаҳрида бўлиб ўтган брифингда Европада коронавирус пандемиясининг учинчи тўлқини бошланганини эълон қилди, дея хабар берди ТАСС.
Унинг таъкидлашича, бу оммавий вакцинация жараёнини тезлаштиришга сабаб бўла олади.
«Биз Европа Иттифоқи мамлакатларида аста-секин, баъзи жойларда ҳатто тез суръатларда бошланаётган учинчи тўлқинни кўрмоқдамиз. Бу биз учун аҳолини эмлашни тезлаштириш зарурлигини кўрсатмоқда», — деди у.
Европадаги вазият
Италия 15 мартдан бошлаб COVID-19 инфекцияси тарқалишига қарши жиддий карантин чораларини кўра бошлади. Мамлакатдаги 20 та вилоятдан 10 таси, жумладан Рим ва Милан шаҳарлари қизил ҳудуд деб белгиланди. Ушбу ҳудудларда мактаблар ва муҳимлиги бўйича биринчи даражали маҳсулотлар сотмайдиган дўконлар вақтинчалик ёпилди.
Польша ҳукумати 20 мартда бошлаб миллий карантин эълон қилди. Польша соғлиқни сақлаш вазири шу пайтгача мамлакатда ўрнатилган ҳудудий карантинларни вирус тарқалишини тўхтатиш учун етарли эмас деб топди. Шанба кунидан бошлаб Польшада барча савдо марказлари, меҳмонхоналар, маданият ва спорт объектлари вақтинчалик ёпилади.
Украинада эса жиддий карантин ҳудудлардаги ҳолатга қараб, жумладан Киев шаҳрида 20 мартдан 9 апрелгача ўрнатилиши эълон қилинди. Киевда бу вақт оралиғида оммавий тадбир ёки маросимлар, спорт ва маданият, кўнгилочар тадбирлар ўтказиш таъқиқланади. Спорт ўйинларида мухлислар иштирок этиши ҳам маълум муддат таъқиқлаб қўйилади.
Молдавияда ҳам 20 мартдан бошлаб карантин чекловлари ўрнатилди. Чекловларга кўра, мамлакатда оммавий тадбирлар, шу жумладан тўй маросимларини ўтказиш вақтинча таъқиқлаб қўйилади. Оммавий овқатланиш объектларига соат 20:00 дан кейин фақат элтиб бериш хизмати орқали ишлашга рухсат берилади. Шунингдек, савдо марказларига фақат соат 18:00 гача, хўжалик маҳсулотлари дўконларига 15:00 гача ишлаш мумкин қилиб қўйилди.
Болгарияда 22 мартдан бошлаб 10 кунлик жиддий карантин чекловлари эълон қилинди. Хабарга кўра, бу вақт оралиғида мамлакатдаги барча овқатланиш жойлари, театрлар, кинотеатрлар ва майдони 300 кв.метрдан катта бўлган савдо марказлари фаолияти тўхтатиб турилади.
Шунингдек, Европанинг бир қатор мамлакатларида чекловлар ҳудудлардаги вазиятга қараб белгиланган. Париж шаҳрида бир қатор чекловлар амал қилаётган бўлса-да, кунлик вирус юқтириш ҳолатлари камаймаяпти.
Бундай ҳолат юзасидан Европа Иттифоқининг бир қатор мамлакатлари, жумладан Франция, Италия, Германия, Словения, Латвия ҳукумати расмийлари AstraZeneca вакцинасидан фойдаланишни давом эттиришга мажбур эканликларини маълум қилишди. Шунингдек, Нидерландия ва Португалия ҳукуматлари кейинги ҳафтадан, Испания ҳукумати 24 мартдан ушбу вакцина билан эмлаш жараёнини тиклашларини эълон қилишди. Шу билан бир қаторда, Дания, Норвегия ва Швеция бундай қарор чиқаришга шошмаслигини маълум қилди.
Эслатиб ўтамиз, биринчилардан бўлиб AstraZeneca вакцинасидан фойдаланишни Дания, Норвегия ва Исландия каби мамлакатлар эҳтиёткорлик чораси сифатида вақтинчалик тўхтатиб қўйган эди. Кейинчалик ЕИнинг энг йирик мамлакатлари — Германия, Франция, Италия ва Испания ҳам Оксфорд университети ва AstraZeneca томонидан ишлаб чиқилган вакцинадан фойдаланиш тўхтатилганлигини эълон қилганди.
Бироз вақт ўтгач ЖССТ AstraZeneca вакцинасини COVID-19'га қарши қўллашда давом этишни тавсия қилди.
Германия сиёсатчилари, бир қатор федерал ерлар раҳбарлари Россиянинг «Спутник V» вакцинаси Европа Иттифоқи томонидан рўйхатдан ўтказилгач, уни Германияда қўллашни таклиф қилишмоқда. Уларнинг таъкидлашича, «гап инсонлар саломатлиги ҳусусида бораётганда, вакцинанинг келиб чиқиши аҳамиятга эга бўлмаслиги керак».
