BBC Россиянинг Геленжик шаҳридаги «Путин саройи»нинг қурилишида иштирок этган ўнлаб ишчилар билан суҳбатлашди.
2011 йил кузида саройга ташриф буюрган ишчилардан бири саройни 2011 йил 8 октябргача топшириш шошилинч бўлганлигини айтган.
«Биринчи таассурот худди мен Миср пирамидалари қурилишига тушиб қолгандек эдим. Ҳисоб-китобларимга кўра, ўша пайтда қурилиш майдонида тахминан 1,5 минг киши ишлаган. Ҳарбийлар, ўзбеклар, руслар, барчалари аралаш. Жуда шошилишар эди», — деб эслайди у.
Муҳолифатчи Алексей Навалний томонидан ташкил этилган Коррупцияга қарши кураш фонди 19 январь куни «Путин учун сарой» номли катта суриштирув ўтказганини маълум қилган эди.
Қурилиш давлатга тегишли «Роснефть» ва «Транснефть» томонидан молиялаштирилганлиги айтилган.
Суриштирув муаллифлари ушбу схемани «дунёдаги энг катта пора» деб аташган ва сарой ва узумзорларга сарфланган маблағларнинг умумий миқдорини камида 100 млрд рубль (1,35 млрд доллар) деб ҳисоблашган.
Ҳозирда ушбу суриштирув ҳақидаги фильм 111 млн мартадан кўп кўрилган.
