Президент Шавкат Мирзиёев 27 январдаги йиғилишда бош прокурорга туманларда коррупция сабабларини ўрганиш топшириғини берди, дея хабар бермоқда «Газета.uz» мухбири.
«Бош прокурор Ниғматилла Йўлдошев бир ойдан кейин Коррупцияга қарши кураш бўйича Миллий кенгаш йиғилишини ўтказади. Шу вақт ичида у ҳар бир туманга ташхис қўяди, нега „касалланган“, нега „тузалмаяпти“, ким уларни қўллаб-қувватлаяпти», — деди давлат раҳбари.
«Сувга, светга шунча қарз олинди. Ҳамма жойда ўғирлик. Мактаб, коллежлар қурилишида ҳам. Ҳамма жойда коррупция. Бу боғча эмас. 35 миллионлик аҳолини боқиш керак», — дея таъкидлади Шавкат Мирзиёев.
У бош прокурор коррупцияга ботган одамларнинг рўйхатини тузишини ва «уларнинг масаласи кейин кўриб чиқилишини» маълум қилди.
«Ҳамма жойда коррупция. Агар энергетика тизимини 30 йилда тўғри йўлга қўйганимизда эди, муаммо бўлмас эди», — деди давлат раҳбари, энергетика соҳасига тўхталиб.
