Bloomberg COVID-19'га қарши вакциналар бўйича эришилган шартномалар ҳақида маълумот берди. Дунё бўйича умумий 8,33 млрд доза вакцина бўйича келишувлар мавжуд. Бу дунё аҳолисининг ярмини эмлаш учун етарли (вакциналарнинг айрим турлари икки марта эмлашни талаб қилади).
Энг кўп вакцина бўйича келишувларга Ҳиндистон эга — 2,2 млрд доза (AstraZeneca/Oxford, Novavax, Gamaleya). Шунингдек, Европа Иттифоқи 1,4 млрд доза, АҚШ 1 млрд дан ортиқроқ доза вакциналар сотиб олиш бўйича келишувларга эга.
Бу борада аҳоли жон бошига вакцина бўйича энг катта қамров Канадада — 214 млн доза (аҳоли сони 38 млн), 303% қамров (Novavax/Sanofi, Moderna, AstraZeneca/Oxford, Medicago, Pfizer/BioNTech, Johnson & Johnson).
Ўзбекистон эса 70 млн доза (110% қамров) вакцина бўйича келишувга эга (фақат Gamaleya билан).
Энг кўп буюртма берилган вакцина тури AstraZeneca/Oxford компаниясига тегишли бўлиб турибди — 2,9 млрд доза. Шунингдек, Novavax компанияси вакциналар бўйича 1,2 миллиарддан ортиқ буюртма олган.
