Нидерландия, Дания ва Австралияда бундан аввал Буюк Британияда аниқланган коронавируснинг янги штамми аниқланди. Бу ҳақда РИА Новости Жахон Соғликни Сақлаш Ташкилоти маълумотларига асосланиб хабар бермоқда.
Италия Соғлиқни сақлаш вазирлиги, шунингдек, мамлакатда SARS-CoV-2 нинг мутацияланган тури қайд этилганлигини айтди.
Вирус юқтирган бемор Буюк Британиядан Римга етиб келган.
Коронавируснинг ушбу штамми бошқа кўринишларга қараганда тезроқ тарқалмоқда, деди Британия соғлиқни сақлаш вазири. Маълумотларга кўра, у одатдагидан 70% кўпроқ юқумли. Шу билан бирга, коронавируснинг ушбу штамми ўлимга олиб келади ёки вакциналарга турлича таъсир қилади, деб ҳисоблаш учун ҳозирча ҳеч қандай асос йўқлиги айтилмоқда.
Дунё бўйлаб йигирмага яқин мамлакат, шу жумладан Европа Иттифоқининг 14 та давлати Британияда аниқланган коронавируснинг янги штамми сабабли мамлакат билан транспорт алоқаларини тўхтатишга ёки чеклашга қарор қилдилар.
Ҳозирда Нидерландия, Бельгия, Италия, Германия, Болгария, Ирландия, Литва, Латвия, Финляндия, Франция, Швеция, Туркия, Швейцария, Канада ва Аргентина мамлакатлари Британия билан транспорт қатновларини тўхтатганини эълон қилди. Греция ва Кипр эса Британиядан келаётганларга қатъий карантин жорий этмоқда.
Нидерландия Вазирлар Маҳкамаси Европанинг бошқа аъзо давлатлари билан «Буюк Британиядан янги вирус штаммини олиб келиш хавфини янада камайтириш имкониятларини ўрганиш» устида ишлашини айтди.
