Европа Иттифоқи мамлакатлари ташқи ишлар вазирликлари агар Беларусда вазият яхшиланмаса Лукашенкога қарши санкциялар эълон қилишга келишиб олишди, дея хабар берди ТАСС ахборот агентлиги ЕИ баёнотига асосланиб.

Европа мамлакатлари Беларусь мамлакати билан ҳамкорликни тўхтатиши ва норозилик ҳаракатларига қўшимча ёрдам кўрсатишлари мумкин. Хабар берилишича, бунга асосий сабаб сифатида Лукашенконинг 23 сентябрдаги яширин инаугурацияси кўрсатилмоқда.

«Европа Иттифоқи Кенгаши, Беларусда агар вазият яхшиланмаса, Александр Лукашенко ва унга алоқадор муассасалар, шунингдек, юқори лавозимли амалдорларга нисбатан янги чеклов чораларини кўришга тайёрлигини эълон қилади», — дейилган баёнотда.

Таъкидланишича, Европа Иттифоқи Беларусь расмийларидан полициянинг намойишларга кўрсатаётган қаршилигини тўхтатишни, барча ҳибсга олинганларни озод қилиш ва норозилик ҳаракати раҳбарияти билан диалог бошлашни талаб қилмоқда. Европа Иттифоқи нодавлат ташкилотлар ва нодавлат оммавий ахборот воситаларига, шунингдек полициядан жабр кўрган барча фуқароларга қўшимча молиявий ёрдам кўрсатишини айтди.

Октябрь ойи бошида Европа Иттифоқи 40 га яқин Беларусь амалдорларига қарши санкциялар жорий қилди. Лукашенко ушбу рўйхатга киритилмаган эди.

Эслатиб ўтамиз, аввалроқ президент сайловлари натижаларига қарши намойишларда бир кун ичида 600 киши ҳибсга олинганлиги ва намойишчиларга қарши сув пуркагичлар ва товушли гранаталаридан фойдаланилганлиги ҳақида хабар берган эдик.