Словакия, Литва ва Германия Александр Лукашенконинг инаугурациясини тан олмасликларини эълон қилган биринчи Европа давлатлари бўлди.
«Ҳеч қандай яширин ва дабдабали маросимлар ушбу тортишувсиз ҳақиқатни инкор этмайди ва қонунийликни рад етмайди», — деди Литва Президенти Гитанас Науседа.
Республика ташқи ишлар вазири Линас Линкявичюс Беларусда бўлаётган воқеаларни «сохта» деб атади: «Сохта сайловлар. Сохта инаугурация. Беларуснинг собиқ президенти бунданда ортиқ собиқ бўла олмайди. Унинг ноқонунийлиги бунинг натижасида келиб чиқаётган барча оқибатларни кўрсатиб бераётган аниқ фактдир».
Словакия ташқи ишлар вазири Иван Корцок ҳам худди шу руҳда гапирди. Унинг сўзларига кўра, Лукашенконинг мамлакатни бошқариш учун қонуний ваколати йўқ: «У на эркин, на адолатли бўлмаган президент сайловлари учун жавобгардир. Словакия Беларусь фуқароларини қўллаб-қувватлайди».
Германия ҳукуматининг расмий вакили Штеффен Зайберт «махфий равишда тайёрланган ва жамоатчилик иштирокисиз ўтказилган» маросимни ташкил этиш форматини индикатив деб атади. Зайбертнинг сўзларига кўра, бундай инаугурациядан сўнг Лукашенко демократик қонунийликка умид қилмаса ҳам бўлади. Шу билан бирга, ФРГ ҳукумати вакили инқироздан чиқиш учун миллий мулоқот зарур эканлигини яна бир бор таъкидлади.
Минскдаги милицияси намойишчиларни сув пуркагичларни қўллаган ҳолда тарқатди. Хавфсизлик кучлари намойишчиларни ҳибсга олишди, улар орасида ярадорлар бор. Шунга қарамай, юзлаб одамлар пойтахт марказини тарк этмадилар. Маҳаллий ҳуқуқ-тартибот идоралари Минскда 10 дан ортиқ киши ҳибсга олинганини ва уларнинг сони аниқланаётганини айтмоқда.
Пойтахт Мустақиллик саройидаги инаугурация маросими яширинча ташкил қилинди ва республика телеканалларида жонли эфирда намойиш этилмади. У ёзиб олинган ҳолда кейингчалик эфирда намойиш этилди. Инаугурация пайтида Лукашенко «мамлакатда рангли инқилоб мағлубиятга учраганини» эълон қилди.
Инаугурация маросимидан сўнг дарҳол Минскда оппозициянинг Telegram каналлари орқали норозилик намойишлари бошланиши эълон қилинди. Норозилик акциялари мамлакатнинг бошқа шаҳарларида, жумладан Витебск, Гродно ва Могилевда ҳам бўлиб ўтди.
