11 октябрь куни Беларусда август ойидаги президентлик сайловлари натижаларидан норози бўлганларнинг «Ғурур марши» бўлиб ўтди. Мамлакат бўйлаб полиция 600 кишини ҳибсга олди, дея хабар берди Беларуснинг «Весна» инсон ҳуқуқлари маркази. Ташкилот сайтида ҳибсга олинганларнинг рўйхати доимий равишда янгиланади.
TUT.BY порталининг хабар беришича, митинглар Минск, Брест, Витебск, Могилев, Гродно, Жодино, Кобрин ва бошқа шаҳарларда бўлиб ўтган. Пойтахтда эрталаб марказий майдонлар ўраб олинган ва кун давомида баъзи метро бекатлари ва савдо марказлари ёпилган.
Хавфсизлик кучлари марш иштирокчиларини колоннада бирлашишига йўл қўймасликка ҳаракат қилишди. Улар, шунингдек, журналистларни ҳибсга олишди — нафақат TUT.BY, БелаПАН, Onliner, «Белсат» мустақил нашрларининг мухбирлари, балки БелТА давлат агентлиги, шунингдек Россия ТАСС мухбирларни ҳам.
Намойишчиларни тарқатиш учун хавфсизлик кучлари товушли гранаталардан, газ ва тўқ сариқ рангдаги суюқлик пуркагичларидан фойдаланган. TUT.BY хабарига кўра, намойишчилар балаклава (кўз ва оғиз очиқ бўлган ниқоб) ва спорт костюмларидаги номаълум шахслар томонидан ҳамда полиция томонидан таёқ билан калтакланган. Гувоҳларнинг сўзларига кўра, 9 ва 12 август кунлари Минск кўчаларида бундай зўравонликлар бўлмаган.
Беларусда президентлик сайловлари 9 август куни бўлиб ўтган эди. Мамлакат МСК ҳисоботига кўра, сайловчиларнинг 80,1 фоизи Александр Лукашенкога, 10,1 фоизи — Светлана Тихановскаяга, 4,59 фоизи ҳаммага қарши овоз беришди. Сайлов натижалари эълон қилинган кундан бошлаб мамлакатда норозилик акциялари тўхтагани йўқ.
