Бирлашган Араб Амирликлари Исроилга қарши бойкотнинг бекор қилинганлигини эълон қилди, дея хабар берди Reuters.
Чекловлар БАА Президенти шайх Муҳаммад бин Заид Ал-Нахайян томонидан бойкот ва уни бузганларга қарши жазолар қўллаш ҳақидаги 1972 йилги декрет бекор қилинганидан сўнг олиб ташланди. Ҳужжатларда кўрсатилишича, ушбу чора «икки томонлама муносабатларни ўрнатиш ва ҳамкорликни қўллаб-қувватлаш мақсадида» амалга оширилди.
Бойкотнинг бекор қилиниши БАА компанияларига ҳам, жисмоний шахсларига ҳам исроиллик ҳамкасблари билан бирга ишлаш имкониятини беради.
Аввалроқ Исроил ва БАА расмийлари АҚШ воситачилигида муносабатларни яхшилаш бўйича келишувга эришган эди. Битим шартларига кўра, Исроил ўз суверенитетини Ғарбий Соҳил ҳудудига етказиш тўғрисидаги қарорни вақтинча кейинга қолдиради. Шартноманинг расмий имзоланишидан олдин томонлар музокаралар олиб боришлари ва элчихоналарни очишлари, шунингдек савдо ва сайёҳлик алоқаларини муҳокама қилишлари керак.
БАА Исроил билан тўлиқ дипломатик алоқаларни ўрнатган учинчи араб мамлакати бўлди. Аввалроқ, Миср ва Иордания Исроил билан тинчлик битимига эришган эдилар.
