Исроил ва Бирлашган Араб Амирликлари (БАА) муносабатларни тўлиқ нормаллаштиришга келишиб олишди. Бу ҳақда АҚШ президенти Дональд Трамп томонидан Twitter га жойланган уч томонлама қўшма баёнот матнида айтилган.
«Ушбу тарихий дипломатик ютуқ Яқин Шарқ минтақасида тинчликни мустаҳкамлашга ёрдам беради ва уч давлат раҳбарларининг мардлиги ва узоқни кўра билиши, шунингдек, Бирлашган Араб Амирликлари ва Исроилнинг минтақада улкан потенциал яратадиган янги йўлни режалаштиришдаги жасоратидан далолатдир», — дейилади баёнотда.
Яқин орада Исроил ва БАА делегациялари учрашиб, сармоялар, туризм, тўғридан-тўғри авиақатновлар, хавфсизлик, элчихоналарни очиш ва бошқа масалалар бўйича икки томонлама шартномалар имзолашади.
Келишувларга кўра, Исроил ғарбий соҳил ҳудудлари устидан ўз суверенитетини эълон қилишни тўхтатади ва араб дунёсининг бошқа мамлакатлари билан алоқаларни кенгайтиришга эътибор қаратади.
Бундан ташқари, Исроил ва БАА Исроил-Фаластин можаросига «адолатли, кенг қамровли ва мустаҳкам ечим» излашга келишиб олишди.
Абу-Даби валиаҳд шаҳзодаси Муҳаммад бин Заид Ал-Нахайян ўзининг Twitter саҳифасида шартнома имзоланганини тасдиқлаб, БАА ва Исроил ҳамкорлик учун йўл харитасини ишлаб чиқишини таъкидлади. Шунингдек, у Исроилнинг кейинчалик Фаластин ҳудудларини аннексия қилишига чек қўйишига келишиб олинганини қўшимча қилди.
Исроил бош вазири Биньямин Нетаньяху битим эълон қилинганидан кейин телевидение орқали қилган чиқишида, у фақат «ортга суришга» рози бўлганини ва «ҳеч қачон бу ерга бўлган ҳуқуқларимиздан воз кечмаймиз», деди, деб таъкидлади Al Jazeera телеканали.
Нетаньяху, шунингдек, «у БАА билан келишувдан сўнг бошқа араб давлатлари ҳам минтақадаги тинчлик доирасига қўшилишига умид боғлашга асос бор», дея таъкидлади.
Ўз навбатида, Фаластин раҳбарияти Исроил ва БАА ўртасидаги келишувни рад этди ва буни «Қуддус, Ал-Ақсо ва Фаластин ишига бўлган хиёнат» деб атади, дея хабар берди WAFA агентлиги. Норозилик сифатида мамлакат ҳукумати БААдаги элчисини чақириб олишга қарор қилди.
БАА Исроил билан тинчлик шартномасини тузган учинчи араб давлатига айланди. Исроил 1979 йилда Миср билан, 1994 йилда эса Иордания билан битим тузган.
