16 август куни Минскда иккита намойиш бўлиб ўтди: Лукашенко тарафдорлари ва унга қаршилар.
Беларусь Ички ишлар вазирлигининг маълумотига кўра, Лукашенкони қўллаб-қувватлаш учун ташкил этилган намойишда 65 минг киши қатнашган. Ушбу намойиш қатнашчиларининг бир қисми мамлакатнинг турли ҳудудларидан автобусларда олиб келингани ҳам қайд этилди. Уларнинг орасида асосан бюджет ташкилотлари ишчилари бўлганлиги айтилмоқда.
Минскдаги Мустақиллик майдони. Фото: Vse42.ru.
Намойиш Минскдаги Мустақиллик майдонида бўлиб ўтди, намойишчиларнинг олдига Беларусь президенти Александр Лукашенконинг ўзи чиқиб, уларга мурожаат қилди.
«Мен сизларни бу майдонга чақирмоқчи эмасман, ишларингиз кўп… Мен митинглар тарафдори эмасман, лекин сизларни ёрдамга чақиришга мажбур бўлганим менинг айбим эмас», — дея таъкидлади президент. У ўз тарафдорларини ўзини «химоя қилиш» учун эмас, ўз мамлакатларини ҳимоя қилишлари учун чақирганлигини айтди.
Лукашенко қайта сайловлар бўлиб ўтмаслигини маълум қилди: «80 фоиздан ортиқ қалбакилаштириш бўлиши мумкин эмас! Бўлиши мумкин эмас… (Янги — таҳр.) сайловларни ким ўтказади? Ким у сайловларга боради?..»
Лукашенконинг ҳокимиятдан кетишини талаб қилганларга қарата президент шундай деди: «Улар менга „Кет!“ деб бақиришяпти. Гап бўлиши мумкин эмас! Гап йўқ, гап йўқ! Лекин улар бизни ва болаларимизни ўлдиришади ва шилиб олишади. Эсингизда тутинг». Лукашенко тарафдорлари президент нутқидан кейин тарқала бошлашди.
Сайлов натижаларидан норози бўлган аҳоли ҳам якшанба куни намойишга чиқишди. Турли маълумотларга кўра, Минск кўчаларига 200 минг атрофида одам чиққан, бу Беларусь тарихидаги энг йирик намойиш. Мамлакат Ички ишлар вазирлиги маълумотларига кўра, намойишлар қатнашчилари орасида тўқнашувлар юз бермаган.
Лукашенкога қарши намойиш қатнашчилари пойтахт кўчалари бўйлаб узун колонналар ташкил этишди, кейин эса Ҳукумат уйи олдида тўпланишди.
Минск. Фото: РИА Новости.
Минскдан ташқари, мамлакатнинг бошқа шаҳарларида ҳам оппозиция тарафдорлари намойишларга чиқишган: Пинск, Брест, Гродно, Могилёв, Витебск ва Барановичи.
Витебск. Фото: Радио Свобода.
Брест. Фото: Спутник.
Гродно. Фото: Радио Свобода.
Гродно. Фото: Радио Свобода.
Гродно. Фото: Радио Свобода.
Могилёв. Видео: Nexta Live.
Шу куннинг ўзида, Лукашенко Россия президенти Владимир Путин билан телефонда гаплашиб, Беларусдаги вазиятни муҳокама қилган. Путин Коллектив хавфсизлик шартномаси ташкилоти (ОДКБ) доирасида Лукашенкога ёрдам беришга тайёр эканлигини билдирган.
