Ички ишлар вазирлиги Ўзбекистонда карантин чоралари бекор қилинганидан сўнг барча масжидлар ҳеч қандай чекловларсиз ўз фаолиятини давом этиши маълум қилди. Бу ҳақда вазирлик расмий баёнотида қайд этиб ўтди.
Таъкидланишича, дунё миқёсида кузатилаётган коронавирус пандемияси шароитида Ўзбекистонда ҳам бошқа давлатлардаги каби намозларни масжидларда жамоа билан ўқишда чекловлар жорий қилинди. Лекин, шу билан бирга, бу чекловларнинг барчаси вақтинча ўрнатилган бўлиб, мамлакатда коронавирус инфекцияси тарқалиши хавфи камайиши билан уларни босқичма-босқич ечиш кўзда тутилган.
«Жумладан, карантин чоралари бекор қилинганидан сўнг Ўзбекистондаги барча масжидларда фуқароларнинг ҳеч қандай чекловларсиз намозларини жамоа билан адо этишлари учун зарур шарт-шароитлар таъминланади. Шу ўринда, Ички ишлар вазирлиги масжидларга вояга етмаган фуқаролар ва болаларнинг ўз ота, ака-ука ва яқин қариндошлари ҳамроҳлигида намоз ўқиш учун эркин келиб-кетишлари мумкинлигини эслатиб, бунга қонунчилигимизда ҳеч қандай тақиқлар мавжуд эмаслигини алоҳида таъкидлайди», — дейилади ИИВ рсмий баёнотида.
Эслатитиб ўтамиз, 2019 йили 23 май куни Ўзбекистон Мусулмонлар идораси раиси, муфтий Усмонхон Алимов «Америка овози»га берган интервьюсида «болалар масжидга киритилмасин» деган тартиб борлигини рад этиб, бундай тартиб бўлмаганини ва вояга етмаган, ёш болалар ҳамда ўсмирларни масжидга намоз ўқишга келиши учун ҳеч қандай тўсиқ йўқлигини айтиб ўтганди.
«Мен қайси бир масжидга борадиган бўлсам, у ерда ёш болаларни кўраман. Ёш болаларга ҳеч ким ҳеч нарса дегани йўқ. Болалар киритилмасин, деган тартиб йўқ. Бундай тартиб умуман бўлмаган, бу ташқаридаги гаплар… Биз ҳам шу гапларни эшитамиз, лекин намоён бўлгани бошқача. Бизга ҳам айтишади, текширганимизда ҳеч қандай тўсиқ йўқ. Лекин, битта гап — ёш болалар илм билан шуғулланиши керак. Илм афзалми, ибодат афзалми? Илм афзал. Бу гап сен келмагин, дегани эмас. Тушунган одам тушунади», — деганди муфтий Усмонхон Алимов.
Шунингдек, 11 июнь куни АҚШ давлат котиби Майк Помпео Ўзбекистон ҳукуматини мамлакатда диний эркинлик билан боғлиқ вазият яхшиланганини айтиб ўтганди. Лекин, шу билан бир қаторда, Давлат департамент ўзининг 2019 йил якуни бўйича тақдим этган Динний эркинлик ҳисоботида Ўзбекистон ҳукуматидан 16 ёшга етмаган фуқароларга ота-онасининг рухсатисиз масжидга бориш тақиқини бекор қилишга чақирганди.
