2041 йилда Тошкент аҳоли 2,5 млн кишидан 3,3 млн кишига, ҳудуди эса 33 минг гектардан 41,5 минг гектарга етказиш режалаштирилмоқда. Бу жамоатчилик муҳокамаси учун эълон қилинган «Тошкент шаҳрини 2041 йилгача ривожлантириш бош режа лойиҳасини ишлаб чиқишга оид чора-тадбирлар тўғрисида"ги Ўзбекистон президенти қарори лойиҳасидан ўрин олган.
Тошкент шаҳри бош режаси коцепциясининг асосий қоидалари пойтахтни келгусида Марказий Осиёнинг йирик маъмурий-хўжалик, маданий ва илмий саноат маркази сифатида ривожланишини кўзда тутади.
Бош режа концепциясида алоҳида эътибор қуйидаги муаммоларни ҳал этилишига қаратилган:
- Ўзбекистоннинг пойтахтига муносиб бўлган шаҳар муҳитини гуманизациялаш ва қиёфасини такомиллаштириш учун архитектура-режалаш шарт-шароитларини яратиш;
- янги қурилиш, ҳудудларни режадан ташқари қурилган ва эскирган қурилмаларни реконструкция қилиш йўли билан ҳудудлардан самарали фойдаланган ҳолда ўртача қаватлилигини ошириш;
- транспорт тузилмаларини такомиллаштириш йўли билан шаҳар объектларига етиб бориш вақтини камайтириш ва шаҳарнинг асосий вазифаларини бир-бирига нисбатан қулай жойлаштириш;
- Шаҳар режасига яшил технологияларни қўллаш, экологик зарарли объектларни шаҳар ташқарисига олиб чиқиш йўли билан шаҳарнинг экологик аҳволини яхшилаш;
- замонавий ресурс тежовчи технологияларни ҳисобга олган ҳолда муҳандислик инфратузилмаларни қайта ташкиллаштириш ва модернизация қилиш;
- ҳудудларни кўкаламзорлаштириш ва транспорт артерияларини ободонлаштириш;
- янги турар мавзеларни барча зарурий муҳандислик коммуникациялари билан таъминланган ҳолда жойлаштириш;
- Илмий гидрогеологик текширувлар асосида ер ости сувлари ҳажмини пасайтириш бўйича шаҳарнинг ҳудудларини муҳандислик тайёргарлиги бўйича чора-тадбирлар ишлаб чиқиш ва амалга ошириш.
Концепцияга кўра, Тошкент аҳолиси 2018 йилда 2,490 млн, 2019 йил 1 апрель ҳолатида 2,510 млн кишини ташкил этгани, 2041 йилда эса 3,3 млн кишига етиши кўзда тутилмоқда.
Шаҳарнинг замонавий ҳудуди эса (2018йил) 33,068 минг гектарни ташкил этади. 2041 йилга бориб эса пойтахт ҳудуди 41,5 минг гектарга етади.
Концепцияда шаҳар таркибига Хонобод посёлкаси, Ўзгариш посёлкаси, Юнусободнинг шимол қисми (Тошкент тумани), Салар посёлкасининг, Олмос посёлкаси (Қибрай тумани) бир қисми, Сергелига туташ бўлган (Зангиота, Янгийўл, Юқоричирчиқ туманлари), Бектемир туманининг жанубий ҳудудлари (Қуйичирчиқ тумани)ни киритиш режалаштирилмоқда.
Шаҳарни ривожлантириш учун Тошкент вилоятининг ерларидан, биринчи галда қурилиш кўзда тутилган ер участкаларини ажратиш ва ҳисоб-китоб муддатига 8,4 минг гектар ер участкаларини ажратиш кўзда тутилган.
Қарор лойиҳаси муҳокамалари 13 майга қадар давом этади.
