2014−2018 йиллар давомида бутун дунёда 1109 нафар журналист ўлдирилди. Бу аввалги беш йилликка нисбатан 18 фоизга кўп демакдир. 90 фоиз ҳолатда айбдорлар жазога тортилмаган. Ушбу маълумотлар 2 ноябрь куни нишонланадиган Журналистларга қарши жиноятлар учун жазосизликка барҳам бериш халқаро кунига бағишланган ЮНЕСКО ҳисоботида эълон қилинди, дея хабар берди БМТ Янгиликлар маркази.
Ҳисоботга кўра, журналистлар учун энг хавфли минтақа араб давлатлари бўлиб, у ерда касбий фаолияти учун ўлдирилганлар ОАВ ходимларининг учдан бир қисми ҳалок бўлган. Иккинчи ўринда — Лотин Америкаси ва Кариб денгизи мамлакатлари — 26 фоиз ва улардан кейин Осиё-Тинч океани минтақаси.
Ташкилот маълумотларига кўра, собиқ совет иттифоқи ҳудудида Россияда кўплаб журналистлар ўлдирилган — 1996 йилдан бери 34 нафар. 14 иш, шу жумладан Анна Политковскаянинг ўлдирилиши фош қилинган деб ҳисобланади. Украинада эса 1995 йилдан бери 16 мухбир ўлдирилди, уларнинг қотиллари топилмади. Озарбайжонда бу даврда 3 журналист ўлдирилди, битта иш фош қилинган.
Ўлганларнинг аксарияти чет эллик ҳарбий мухбирлар эканлигига ишонилади. Аслида, ҳисоботда айтилишича, ўлдирилганларнинг ярмидан кўпи ҳокимиятни суиистеъмол қилиш ва коррупция ҳолатларини текширган журналистлардир. Ўлганлар орасида маҳаллий журналистлар — 93 фоиз.
ЮНЕСКО маълумотларига кўра, журналистларнинг ўлдирилишида айбдор бўлганларни жазолаш камдан-кам учрайди. Тергов деярли ҳеч қачон ўз натижасини бермайди ва жазосиз қолиш янги жиноятларга олиб келади. Буни ўзгартириш керак, дейди ЮНЕСКО бош директори Одри Азуле.
«ЮНЕСКО журналистларни хавф остида қолдирганларнинг барчасини: уларни ўлдираётганларни ва ушбу қонунсизликка чек қўйиш учун ҳеч нарса қилмайдиганларни жавобгарликка тортишга чақиради. Журналистнинг ўлими ҳеч қачон ҳақиқатни излашдан тўхташни англатмаслиги керак», — дея таъкидлади ташкилот раҳбари.
