Мактаб директорларини калтаклаган Сайхунобод туман ҳокими Носиржон Эгамбердиев ишдан бўшаш тўғрисида ариза ёзди, дея маълум қилди туман ва вилоят маъмурияти вакиллари «Газета.uz"га. У мазкур лавозимда 2016 йил октябридан буён фаолият кўрсатиб келаётган эди.

Сентябрда интернет тармоғида ҳокимнинг маҳаллий мактаблар директорларини ҳақоратлаб, калтаклагани тасвирланган видеоролик эълон қилинди. Айни пайтда прокуратура хизмат текширувини олиб бормоқда.

Сайхунобод туманига Мирзаобод туманининг собиқ ҳокими Ботир Мирзақулов раҳбар лавозимига тасдиқланган. Ўз навбатида Мирзаобод туманига Сирдарё вилояти прокуратурасининг қишлоқ хўжалиги соҳасида қонунчиликнинг ижро этилиши устидан назорат бўлимининг собиқ бошлиғи Ҳамидулла Абдуллаев ҳоким бўлди.