Қашқадарё вилоятидаги Таллимаржон иссиқлик электр станциясида ҳар бирининг қуввати 450 МВтдан бўлган икки дона буғ-газ ускунасини қуриш ишлари якунига етказилмоқда.
Биринчи БГУ блокининг газ турбинаси Ўзбекистон мустақиллигининг 25 йиллиги арафасида — 2016 йилнинг августида ишга туширилган эди. Кейинроқ, ноябрь ойида биринчи блок комбинацияланган циклда ишга туширилди.
Пудратчи компания вакилининг «Газета.uz"га хабар қилишича, айни пайтда иккинчи блок бўйича ишга тушириш-созлаш ишлари якунланган бўлиб, бунда унинг комбинацияланган циклда ишлаши ҳам таъминланган. Бу эса ҳар икки блокнинг 800 МВтгача қувватда энергия ишлаб чиқаришига имкон беради.
Келгусида ускуналар фаолиятини оптималлаштириш ва қурилмаларни тўлиқ лойиҳавий қувватда ишлаши билан топшириш-қабул қилиш синовларни ўтказиш ишлари амалга оширилади.
Барча ишлар якунига етганидан сўнг станциянинг жами қуввати 1700 МВтга етиб, Ўзбекистоннинг электр энергиясига бўлган эҳтиёжини сезиларли даражада қоплаш, мамлакат жануби-ғарбий қисмларини энергия билан таъминлаш даражасини оширишга имкон туғдиради. Барча ишлар март ойида тугалланганидан сўнг янги қурилмалар «Ўзбекэнерго» компаниясига фойдаланишга топширилади.
Комбинацияланган циклли электроблоклардан фойдаланиш энергия манбаларидан самарали фойдаланиш ва ёқилғини 20 фоизгача иқтисод қилишга имкон беради. Янги энергоблокларнинг ФИК 55 фоизгачани ташкил этса, эски технология бўйича қурилган энергоблоклардан ФИК 35 фоизга етади.
Ишлар Hyundai ва Daewoo консорциуми томонидан Осиё тараққиёт банки ва Япониянинг халқаро ҳамкорлик агентлиги (JICA) кредитлари ҳисобидан амалга оширилмоқда. Модернизация учун дунё амалиётида юқори самарадорлик кўрсатган Mitsubishi (газ турбина), Fuji (буғ турбина) ва Doosan (қозонхона-утилизатор) каби ишлаб чиқарувчилар қурилмаларидан фойдаланилмоқда.
Келгусида яна икки дона худди шундай БГУ қурилиши режалаштирилган.
