Ўзбекистон Ҳукумати билан Франция Республикаси ҳукумати ўртасида Ўзбекистон Республикасида Франция тараққиёт агентлиги ва ПРОПАРКОни таъсис этиш ва уларнинг фаолияти тўғрисида Битим имзоланди.
ТИВ матбуот хизматининг хабар қилишича, битим 8 декабрь куни ЙХҲТ ТИВКнинг навбатдаги мажлисида иштирок этаётган Ўзбекистон ташқи ишлар вазири Абдулазиз Камилов Гамбург шаҳрида Франция Республикасининг Ташқи ишлар ва халқаро тараққиёт вазири Жан-Марк Эро билан учрашувда имзоланди.
Битимда Франция тараққиёт агентлиги (ФАР) ва унинг шўба ташкилоти «Иқтисодий ҳамкорлик учун кўмаклашиш ва иштирок этиш жамияти» (ПРОПАРКО)нинг Ўзбекистон ҳудудида фаолият юритиш тартиби ва шартлари белгиланган.
Ҳужжат икки давлатда ҳам белгиланган ички протседуралар якунланганидан сўнг кучга киради ва учрашувда таъкидланганидек, Ўзбекистон ва Франция ўртасидаги инвестицион ва молиявий-техник ҳамкорликни кенгайтиришга ҳамда қўшма лойиҳаларни амалга оширишда самарадорликни оширишга имкон беради.
ФАРнинг Ўзбекистонда фаолият олиб боришни режалаштиргани тўғрисида илк бор 2011 йилда хабар қилинган, шундан сўнг музокаралар олиб бориш учун агентлик миссияси ташриф буюрган эди.
