Ўзбекистон Вазирлар Маҳкамасининг 20 майдаги қарори билан 2016-2020 йилларда Тошкент ҳайвонот боғини ривожлантириш концепцияси тасдиқланди. Ҳужжат матни Lex.uz`да эълон қилинди.
Концепцияда жониворларни сақлаш учун янада қулай шароитларни яратиш, уларнинг яшаш муҳитини табиийга имкон қадар яқинлаштириш кўзда тутилган. Жумладан, «мавжуд экспозиция вольерлари ташқи кўринишини жаҳоннинг етакчи ҳайвонот боғлари мисолида тубдан ўзгартириш» режалаштирилмоқда.
Мавжуд вольерларни реконструкция қилиш ва коллекцияларнинг тур ва таркибини кенгайтириш учун янги замонавий вольерлар қуриш, шунингдек, юқори технологияли «Акванариум» бунёд этиш ҳамда денгиз жониворлари ва балиқларидан иборат экспозиция яратиш белгиланган.
Ҳужжатда фаунистик тадқиқотларни ривожлантириш учун замонавий илмий мажмуа, шунингдек, зоология ва зоомуҳандислик лабораториялари барпо этиш ҳамда янги тиббий ускуналарини харид қилиш билан ветеринария шифохонасининг техник базасини мустаҳкамлаш кўзда тутилган.
Бундан ташқари, ташриф буюрувчилар учун қўшимча қулайликлар яратиш, шу жумладан, аудиокитоб хазматини ташкил этиш, замонавий аттракционларга эга болалар майдончаси, кафе ҳамда Wi-Fi ҳудудларини барпо этиш белгиланган. Боғ бўйлаб экскурсиялар ташкил этиш учун икки дона электромобиль харид қилиш ҳам қайд этилган.
Қарорда Самарқанд ва Фарғонада Тошкент ҳайвонот боғи филиалини очиш ҳамда Термиздаги ҳайвонот боғини реконструкция қилиш ҳам белгиланган.
Тошкент ҳайвонот боғи 1924 йил Ўрта Осиё университети зоолог олимлари ташаббуси билан ташкил этилган. 1994 йилда Ботаника боғи билан бир қаторда янги ҳайвонот боғи қурилиши бошланди. У 1997 йилда очилди.
Бугунги кунда пойтахт ҳайвонот боғининг ҳудуди 21,5 гектарни ташкил этиб, унда 7000 дан зиёд экзотик, ноёб ва йўқолиб бораётган жониворлар, қуш ва балиқ турлари яшамоқда.
