«Тошкент трамвайи» унитар корхонасига тегишли бино ва иншоотлар пойтахтда трамвай йўналишлари тўлиқ ёпилиши муносабати билан аукцион савдоларига қўйилади. Бу Вазирлар Маҳкамасининг 5 апрелда қабул қилинган «Тошкент шаҳрида транспорт инфратузилмасини янада такомиллаштириш чора-тадбирлари тўғрисида»ги Қарорида кўзда тутилган.
Умумий майдони 24,3 га (бино ва иншоотлари майдони — 58,3 кв. м)ни эгаллаган объектлар рўйхати «Тошшахартрансхизмат» компанияси сайтида эълон қилинди. Унга 2- ва 3-депо, Шаҳар электр транспортига хизмат кўрсатиш хизматлари ҳамда 1- ва 2-йўллар хизматига тегишли бино ва иншоотлар киритилди.
Ҳукумат ҳужжатида кўрсатилишича, савдолардан тушган маблағлар Ўзбекистон реконструкция ва тикланиш фондининг ўтган йили харид қилинган 400 дона Mercedes-Benz Conecto Low Floor автобуси учун жалб қилинган кредитларини қоплашга йўналтирилади.
22 апрелдан шаҳарда ҳаракатда бўлган иккита трамвай йўналиши (9- ва 13-) фаолиятини тўхтатди. Қолган икки йўналиш (8- ва 17-)нинг қачон ёпилиши ҳозирча маълум эмас.
Ҳукумат 2011-2012 йилларда Чехияда ишлаб чиқарилган 20 та Vario LF трамвай вагонини хорижга сотишни режалаштирган. Айни пайтда харидорлар қидирилмоқда.
«Тошкент трамвайи» паркида жами бўлиб 87 та вагон мавжуд бўлиб, уларнинг 51 таси соз ҳолатда (март ойи сўнгидаги маълумот).
Шаҳарда ёпилган йўналишлардаги трамвай тармоқлари босқичма-босқич олиб ташланиб, йўлларнинг ўтиш қисми таъмирланмоқда ва кенгайтирилмоқда. Барча ишлар 1 сентябрь кунига якунланиши режалаштирилган.
