Тошкент вилояти Тошкент туманида 8 апрель куни чақирувга асосан хизмат олиб бораётган ИИБ ходими пичоқланди, деб хабар бермоқда «Газета.uz»га Бош прокуратура матбуот хизмати.
Шу куни соат 21:30 ларда фуқаро Ж.Р. (1980 йилда туғилган) профилактика инспектори Мурод Халиқовнинг телефон рақамига қўнғироқ қилиб, акаси Ж.Қ. (56 ёшли) билан оилавий жанжал содир бўлаётганини айтган.
Воқеа жойига борган инспектор хонадон дарвозаси олдида қўлида ошхона пичоғи ушлаб турган Ж.Қ.ни кўрган ва ундан қуролни ташлашни сўраган. Аммо у инспекторнинг қонуний талабини бажармай, фаол қаршилик кўрсатган ва пичоқ билан Мурод Халиқовнинг чап бел қисмига бир марта уриб, жароҳат етказган.
Тошкент тумани тиббиёт бирлашмаси томонидан берилган маълумотномага кўра, унинг бел соҳасида санчилган, кесилган жароҳат аниқланган. Вилоят ИИББ матбуот хизматининг маълум қилишича, инспектор ИИВ марказий госпиталига ётқизилган.
Ҳолат юзасидан Ж.Қ.га нисбатан Жиноят кодексининг 219-моддаси 2-қисми (Хизмат вазифасини бажариш ёки фуқаровий бурчини бажаришдан воз кечишга, шунингдек, қонунга хилоф ҳаракатлар содир этишга мажбур қилган ҳолда ҳокимият вакилига ёки фуқаровий бурчини бажараётган шахсга қаршилик кўрсатиш) билан жиноят иши қўзғатилиб, қамоққа олиш тарзидаги эҳтиёт чораси қўлланган. Ушбу жиноятни содир этганликда айбдор деб топилган шахс уч йилдан беш йилгача озодликни чеклаш ёки уч йилдан беш йилгача озодликдан маҳрум қилиш билан жазоланади. Тергов ҳаракатлари олиб борилмоқда.
