6 апрель куни ижтимоий тармоқларда Бухоро вилояти Қурилиш ва уй-жой коммунал хўжалиги соҳасида ҳудудий назорат қилиш инспекцияси раҳбари Баҳодир Тошевнинг давлат идорасида тушлик вақти дастурхон ёзиб, курсдошларини спиртли ичимлик ичишга чақиргани акс этган видео тарқалди.
7 апрель куни Қурилиш вазирлиги ҳолатга муносабат билдириб, инспекция раҳбарини ишдан олиши ҳақида хабар берди.
Келтирилишича, Республика қурилиш соҳасида назорат қилиш инспекциясининг тегишли масъуллари ҳолатни ўрганиб чиққан. Аниқланишича, Баҳодир Тошев ўша куни туғилган куни сабаб курсдошларига видео юбориб, тушлик вақти ишхонада дастурхон ёзилаётгани, келган курсдошлар билан «аввал хатм, кейин отим» қилинишини айтган.
Туғилган кунни офисдаги таомлар ва спиртли ичимликлар билан нишонлаш таклиф қилинган. Видеодаги ҳолат 2023 йил 15 сентябрь, жума куни тасвирга олинган.
Республика инспекция масъуллари Тошевга бундай хатти-ҳаракатлар касб этикасига тўғри келмаслигини тушунтирганини маълум қилди. У ушбу ҳаракати боис эгаллаб турган лавозимидан озод этилиши айтилди.
