1 апрелдан бошлаб Тошкент аэропортининг учиб келиш залида E-auksion.uz электрон платформасида танлов асосида ғолиб деб топилган Sixt Uzbekistan бренди остидаги такси хизмати (Avtobus Rent компанияси) ишлай бошлади. Бу ҳақда Uzbekistan Airports хабар қилди.
Янги такси хизматининг ишлаш технологияси икки йилдан буён фаолият кўрсатаётган Taxi Airport Tashkent такси хизмати билан бир хил — йўловчилар учиб келиш залидаги пештахтага келиб керакли манзилни айтади, компания ходими масофани тариф бўйича ҳисоблаб чиқади ва хизмат ҳақини эълон қилади. Йўловчи нақд пул ёки карта орқали тўловни кассада ёки тўғридан-тўғри машинада амалга ошириши мумкин.
Аэропортда ишлаш учун компания бир нечта тарифларни тақдим этди: «Стандарт», «Комфорт» ва «Бизнес». Саёҳатнинг минимал нархи — 60 000 сўм. Шунингдек, аэропортда янги такси хизмати очилиши муносабати билан компания икки ҳафталик акция эълон қилади — 15 апрелга қадар барча мижозлар «Комфорт» тарифидан «Стандарт» тарифи нархларида фойдаланишлари мумкин.
Такси хизмати парки Chevrolet, Toyota, Kia, Skoda, Hyundai, Golden Dragon ва бошқа маҳаллий ва хорижий автомобиллардан иборат. Зарур ҳолларда йўловчилар 6 дан 19 ўриндиққача эга бўлган микроавтобуслардан фойдаланишлари мумкин, дейилади хабарда.
Тошкент аэропортидаги биринчи расмий такси 2022 йил 12 сентябрь куни ишга тушганди.
