![Исроилда ҳукуматга қарши оммавий намойишлар бўлиб ўтди]()
Фото: X / Alimut Israel
Исроилда ҳукуматга қарши оммавий намойишлар бўлиб ўтди
Ўн минглаб одамлар Тель-Авив ва Қуддус кўчаларига чиқиб, Исроилда муддатидан олдин сайловлар ўтказиш ва ҲАМАС гаровидагиларни озод қилишни талаб қилди. Бу намойишлар Ғазо уруши бошланганидан бери мамлакатдаги энг йириклари бўлди. Полиция намойишчиларни тарқатиш учун сув пуркагичлардан фойдаланди.
Ўтган дам олиш кунлари Тель-Авив ва Қуддусда минглаб одамлар намойишга чиқди, бу 2023 йил октябрь ойида ҲАМАС Исроил ҳудудига ҳужум уюштиргач, Ғазо секторида уруш бошлангандан бери Исроилдаги энг йириклари бўлди, деб хабар бермоқда CNN.
Намойишчилар орасида ҲАМАС томонидан асирга олинган исроилликларнинг қариндошлари ҳам бор, улар гаровга олинганларни озод қилишни талаб қилди. Шунингдек, Исроил бош вазири Беньямин Нетаньяхудан истеъфога чиқиш ва янги сайловлар ўтказиш талаб қилинди. Намойишчилар «Гаровдагиларни ҳозироқ қутқаринг» ва «Уни алмаштиринг, уларни қутқаринг» каби ёзувлар ёзилган плакатларни кўтариб олганди.
Исроил мухолифати етакчиси Яир Лапид намойишда сўзга чиқиб, Нетаньяхуни кескин танқид қилди. Унинг сўзларига кўра, бош вазир учун ўз лавозимида қолиш муҳим, ҳукумат эса гаровга олинганларнинг оилалари борлигига эътибор бермаяпти.
Намойишчилар Тель-Авивда марказий йўлларни тўсиб қўйди, Қуддусда эса Кнессет (парламент) биноси ёнида тўпланиб, Нетаньяху қароргоҳига ёриб киришга ҳаракат қилди. Баъзи иштирокчилар полиция билан тўқнашди. Полиция намойишчиларни тарқатиш учун ёмон ҳидли сувдан фойдаланди, 16 киши ҳибсга олинди.
Якшанба куни қоронғу тушгач, намойишчилар воқеа жойида тунаш учун Кнессет яқинида 100 дан ортиқ чодир қурди. Ҳукуматга қарши норозилик ҳаракатлари коалицияси бу ҳафта яна тўртта митинг ўтказишни режалаштирмоқда.
Axios нашрининг ёзишича, Нетаньяху аввалроқ «Моссад» директори ва бошқа исроиллик музокарачиларнинг ҲАМАС билан гаровга олинганларни озод қилиш бўйича келишувга эришиш учун уларга «кўпроқ ҳаракат эркинлиги» бериш ҳақидаги илтимосларини рад этган. Ҳукуматнинг бир қанча аъзолари ҳам бош вазирни кўпроқ мослашувчанлик кўрсатишга чақирди, бироқ Нетаньяху уларни юмшоқликда ва ҲАМАС билан музокара олиб боришга қодир эмасликда айблади.
