10 март куни Ўзбекистонда футбол бўйича Суперлига чемпионатининг 2-тур ўйинида «Андижон» — «Бунёдкор» учрашуви ўтказилганди. Унда «Бунёдкор» клуби футболчиси Усмонали Исмоналиев учрашув тўхтатилган вақтда рақиб ўйинчиси Муҳаммадкарим Тоировнинг елкасига оёғи билан тепгани учун майдондан четлаштирилган. Бу видео тармоқларда тез оммалашди. Ўйиндан лавҳа X (собиқ Twitter)даги Troll Football аккаунтида ҳозиргача 10 млн марта, бошқа бир оммабоп саҳифада эса 1,4 млн марта кўрилди.
Кадрларда томошабинларнинг эътиборини тортган жиҳат шундаки, футболчи рақибининг елкасига тепганидан сўнг унинг жамоадоши спортчининг йиқилмаганини кўриб, уни йиқилишга чорлаб, тепган.
Футбол ассоциацияси Тартиб-интизом қўмитаси ушбу ҳолат бўйича қарорини эълон қилиб, рақибини тепган Исмоналиевни (Бунёдкор) 2 та ўйинга четлаштирди (дисквалификация) ва жарима интизом чорасини қўллади.
Эслатиб ўтамиз, Усмоналининг ўзи учрашувдан сўнг ҳолатга изоҳ бериб, вазиятни ваҳимали кўрсатиш шарт эмаслигини айтганди.
«Муҳаммадкарим билан ёшликдан катта бўлганмиз, 3 йил бир жамоада тўп тепдик. Оғир кунларимизда бир-биримизни қўлладик, ёнма-ён бўлдик. Оилавий борди-келдимиз бор. Қисқаси, у билан ака-укадек яқинмиз, қалинмиз. Ўйиндан аввал ҳам Тоиров билан анча суҳбатлашдик, ҳазиллашдик. Голимиз VARда текширилаётганда Муҳаммадкарим билан ҳазиллашдик. Бошқа жиддий гап йўқ. Вазиятни чуқурлаштириш, муаммо излаш, ваҳима кўтариш шарт эмас. Хўп, мен четлатилдим, вазиятни қўрқинчли қилиб кўрсатиш, Тоировни йиқитиб, уни ётган жойида тепиш шарт эмасди… Тоиров ўша вақтда ҳакамга „қизил карточка кўрсатманг“ демоқчи эди, улгурмай қолди, чунки уни йиқитишди. Бунинг учун ўзи мендан узр сўради», — дея фикр билдирган у.
Жамоадошининг зарба қабул қилганини кўриб, уни йиқилишга мажбурлаган яна бир футболчи Фарҳод Бекмуратовга ҳам (Андижон) жарима интизом чораси қўлланди.
Бундан ташқари, ўйинда «Бунёдкор» футболчиси Тимурхўжа Абдухолиқов, «Андижон» клубидан Абдулвохид Гулямовлар ҳам жарима олди.
