Канаданинг Квебек шаҳридаги ҳоспис асосчиси Жозе Ганьон Facebook`да беморлардан бири вафотидан олдин «Дюна 2» фильмини кўришни истаётгани ҳақида ёзди. Фильм режиссёри Дени Вильнёв премьерадан 1,5 ой олдин унга ассистенти орқали фильм нусхаси ва компьютерини юборган, дея хабар берди The Washington Post.
Жозе Ганьон дастлаб 2024 йил январь ойи бошида Facebook`да «кимнингдир ҳаёти якунида у учун кичик фокус уюштириш учун» режиссёр Дени Вильнёв контактларини қидираётгани ҳақида пост қолдирган. Постда Вильнёв нима учун кераклиги ҳақида маълумот берилмаган ва бемор ким экани ҳақида ҳам айтилмаган. Орадан бир ярим ой ўтгач, «Дюна 2» фильми кинопрокатга чиққан куни Жозе Ганьон воқеа тафсилотларини тушунтириб берди.
Унинг сўзларига кўра, ҳосписда бир бемор ўлимидан олдин «Дюна 2» фильмини томоша қилишни истаётганини айтган. Ҳоспис асосчиси бемор ҳақида ҳеч нарса айтмаган, фақатгина бемор ўзи тенги одам эканини таъкидлаган (The Washington Post`нинг аниқлик киритишича, бемор 50 ёшдан ошган бўлган). Бемор севимли машғулотлари ҳақида гапирганда, киноларни яхши кўришини айтган.
Фильм режиссёри Дени Вильнёв билан боғланиш анча тезда содир бўлган. Жозе Ганьон бошида фақат режиссёр ўз фильмлари мухлисига миннатдорчилик билдирилган видео жўнатишини истаган. Бироқ Вильнёв ва унинг рафиқаси (у фильм продюсери эди) бу воқеадан «жуда таъсирланган».
«Фильмлар айнан шундай инсон учун суратга олинади», — деган Дени Вильнёв ва унинг рафиқаси.
Шундан сўнг улар ҳоспис бемори фильмни томоша қилиши учун уни Монреалга олиб келиш йўлларини излай бошлаган, бироқ беморнинг ҳолати сафар учун жуда заифлик қилган ҳамда вақт ҳам жуда кам қолган бўлган.
16 январь куни Вильнёвнинг ассистенти ўзи билан ичида фильмнинг нусхаси бўлган режиссёрнинг компьютерини олиб, Квебекга учиб кетган. Бемор учун фильм намойиши пардалар билан ёпилган хонада бўлиб ўтган. Намойишда иштирок этганлар фильм ҳақидаги маълумотларни тарқатмаслик бўйича ҳужжатларга имзо чеккан ва кадрлар чиқиб кетмаслиги учун телефонларини топширган.
Бемор оғриқ туфайли деярли уч соатлик фильмни тўлиқ кўра олмаган ва намойиш тахминан кино ярмида тўхтаган. Бир неча кундан кейин бемор вафот этган.
«Дюна 2» бу воқеадан бир ярим ой ўтгач — 2024 йил 1 мартдан бошлаб бутун дунё бўйлаб намойиш этила бошланди.
