28 февраль куни Қозоғистон парламенти Мажилиси (қуйи палатаси) икки ўқишда қонунчиликка Илон Маскка тегишли SpaceX компаниясининг Starlink сунъий йўлдош интернетидан фойдаланишни маъқулловчи тузатишларни қабул қилди. Энди қонун Сенат томонидан маъқулланиши керак, деб ёзади informburo.kz.
Ҳужжат «алоқа бозорини ривожлантириш, рақамлаштириш ва мамлакатда қулай инвестиция муҳитини яратиш» мақсадида ишлаб чиқилган, дейилади хабарда.
Қонун 2026 йилгача геостационар бўлмаган сунъий йўлдошлардан (Starlink, OneWeb) фойдаланган ҳолда алоқа технологияларини жорий этиш бўйича махсус регламент жорий этишни назарда тутади. Бу чекка қишлоқлардаги ижтимоий объектларни интернет билан таъминлаш имконини беради, дея аниқлик киритди informburo.kz.
Мажилис депутати Екатерина Смишляеванинг таъкидлашича, қонуннинг мақсадларидан бири бундай хизматлардан фойдаланишнинг ҳуқуқий моделини яратиш ҳисобланади, чунки SpaceX`дан ташқари, ўз сунъий йўлдошлари билан шу каби хизматларни таклиф этувчи бошқа хорижий компаниялар ҳам бор.
Тузатишлар қабул қилинишидан бир неча кун олдин Forbes Қозоғистон мамлакатга 500 та тўпламдан иборат Starlink ускунасининг биринчи партияси олиб келинганини ёзганди. Уларни қишлоқ мактабларига ўрнатиш режалаштирилган.
