Ўзбекистонда букмекерлик шохобчаларини қонунийлаштириш масаласи жамиятда кўплаб баҳс-мунозараларга сабаб бўлмоқда, қарорни қабул қилиш бўйича бирор муддат айтишга ҳали эрта, деди Истиқболли лойиҳалар миллий агентлиги (ИЛМА) директорининг биринчи ўринбосари Вячеслав Пак Ахборот ва оммавий коммуникациялар агентлигидаги тадбирда журналистларга.
Эслатиб ўтамиз, Шавкат Мирзиёев 2019 йил декабрь ойида букмекерлик шохобчаларини қонунийлаштиришни назарда тутувчи фармонни имзолаган бўлса-да, 2022 йил апрелига келиб давлат раҳбари янги фармон билан бу қарорни бекор қилган эди. Аммо 2023 йил апрел ойида у яна букмекерлик фаолияти учун меъёрий-ҳуқуқий базани ривожлантиришни буюрган.
«Онлайн қимор ва букмекерлик фаолиятини қонунийлаштириш ёки қонунийлаштирмаслик жамиятнинг ўзи ўртасида жуда зиддиятли масала. Кимдир тарафдор, кимдир қарши. Ҳозир айнан позициямизни аниқлаш масаласи турибди», — деди Вячеслав Пак мамлакатда букмекерлик шохобчаларини қонунийлаштиришнинг эҳтимолий муддатлари ҳақидаги саволга жавоб берар экан.
Унинг аниқлик киритишича, Ўзбекистонда букмекерлик шохобчалари фаолияти тўғрисидаги қарор «қабул қилиниши керак бўлган» таклифларни кўриб чиқиш натижаларига кўра қабул қилинади.
Ҳозирда Ўзбекистон қонунчилигида таваккалчиликка асосланган қимор ва бошқа ўйинларни ташкил этиш ва ўтказиш тақиқланган.
