11 январь куни Uzbekistan Airways компаниясининг Тошкент-Истанбул йўналишидаги HY271 рақамли авиапарвозида фуқаро вафот этди, дея хабар бермоқда Ўзбекистоннинг Туркиядаги элчихонаси матбуот хизмати.
Ўрганилган маълумотларга кўра, 1946 йилда туғилган Ўзбекистон фуқароси Х.Т. давом этиб келаётган сурункали касалликка шифо топиш учун Истанбул шаҳрига кетаётган бўлган. Бироқ авиапарвоз чоғида бемор соғлиғи ёмонлашгани ва юрак хуружини бошдан кечирган.
Экипаж ҳамда йўловчилар ҳамроҳлигида унга биринчи тез тиббий ёрдам кўрсатилган ҳамда юрак пульсининг тўхташи кузатилгач, тиббий кўникмага эга бўлган кишилар томонидан юрак массажи қилинган.
Бироқ муолажа саъй-ҳаракатларга қарамасдан фуқаронинг ҳаётини сақлаб қолиш иложи бўлмаган. Самолёт Анқарага қўнишга мажбур бўлган.
Элчихона томонидан марҳумга тегишли консуллик-ҳуқуқий ёрдам кўрсатилган ҳамда унинг жасади 12 январда Ўзбекистонга жўнатилиши таъминланган.
