17 ноябрь куни Тошкент шаҳридаги «Ҳумо Арена»да профессионал бокс оқшоми ташкил этилди. Кечанинг марказий жангида Баҳодир Жалолов ЖАР вакили Крис Томпсонга қарши рингга кўтарилди. Бундан ташқари, Ўзбекистоннинг бир қатор умидли боксчилари чет эллик рақибларига қарши жанг олиб борди.
Эътиборлиси, ушбу жангларни кузатиб турганлар орасида WBC президенти Маурисио Сулейман, афсонавий Майк Тайсон, уни 2 марта мағлубиятга учратган яна бир афсона Эвандер Холифилд, «Тошкент йўлбарси», афсонавий боксчи Руфат Рисқиев ва бошқа кўплаб бокс дунёси вакиллари ҳам иштирок этди. «Газета.uz» юлдузли кечадан фоторепортаж тайёрлади.
Эвандер Холифилд.
Маурисио Сулейман.
«Тошкент йўлбарси» Руфат Рисқиев.
Чапдан ўнгга: Маурисио Сулейман, Отабек Умаров, Миралишер Мирзиёев ва Майк Тайсон.
Ярим енгил вазнда (57,1 кг) 4 раундлик жангда ўзбекистонлик Абдумалик Халоков профессионал боксдаги дебют жангини ўтказди. У украиналик Олександр Егоровни 2 раунд давом этган жангда мағлуб этди.
Ярим ўрта вазнда (66,6 кг) 8 раундлик жангда Қудратилло Абдуқаҳҳоров танзаниялик рақиби Маоно Аллини нокаутга учратди.
Энг енгил вазнда (53,5 кг) Миразизбек Мирзахалилов хитойлик Рунки Жоуга қарши рингга кўтарилиб, тўлиқ жанг олиб борди. Ҳакамлар қарорига кўра, Миразизбек 80:72, 80:72, 80:72 ҳисобларида ғалаба қозонди. Бу унинг профессионал боксдаги 4-жангидаги 4-ғалабасидир.
Биринчи ярим ўрта вазнда (63,5 кг) WBC Central Asia камари учун жанг тўлиқ 8 раунд бўлиб ўтди. Ўзбекистонлик Мужибилло Турсунов хитойлик Янгченг Жинни 80:72, 80:72, 80:72 ҳисобларида мағлуб этди.
Осиё Олимпия Кенгаши вице-президенти Отабек Умаров бокс афсонаси Майк Тайсон билан риннга чиқиб, америкалик бокс юлдузига WBC фахрий камарини тақдим этди.
Бундан ташқари, президент куёви Отабек Умаров ва Майк Тайсон рингда автоҳалокат сабаб вафот этган Ўзбекистон ММА ассоциацияси вице-президенти Мурод Хонтўраевнинг кичик ўғли Муҳаммад билан ҳам суратга тушди.
Эвандер Холифилдга ҳам рингга таклиф қилинди.
Ўзбекистонликлар учун узоқ кутилган марказий супероғир вазнда 10 раундлик жангда Баҳодир Жалолов ЖАРлик Крис Томпсонни нокаутга учратди.
