Ўзбекистон Профессионал футбол лигаси (ЎзПФЛ) 12 ноябрь куни Қарши шаҳрида бўлиб ўтадиган 2023 йилги Ўзбекистон Кубоги финали учун махсус видеоролик тайёрлади. Роликда финал учрашувида тўқнаш келадиган икки жамоа — Қаршининг «Насаф» ва Олмалиқнинг ОКМК жамоаларининг мураббийлари ва футболчилари ҳам суратга тушган.
ОКМК бош мураббийи Миржалол Қосимов
Nike компаниясининг 1990 йиллар охири — 2000 йиллар бошидаги жаҳоннинг машҳур футболчилари иштирокида суратга олинган мумтоз реклама роликларини (айниқса, «Joga Bonito — The Mission»ни) ёдга солувчи видео бошида қора фургон рулида ўтирган ҳайдовчи (ОКМК бош мураббийи Миржалол Қосимов) Ўзбекистон Кубогининг суратига қараб, машина ичидаги шериклари (ОКМК футболчилари)га тезлашиш кераклигини уқтиради.
ОКМК футболчилари (чапдан) Ботирали Эргашев, Сиёвуш Ҳақназарий, Анзур Исмоилов, Рубен Санчес.
Йўлда уларни бошқа бир машина таъқиб қилади, аммо ета олмайди. Фургон керакли манзилга келганидан сўнг, ҳайдовчи шерикларига қараб: «Қани, болалар бошладик», деб кўрсатма беради.
ЎзПФЛ бош директори Диёр Имомхўжаев.
Шундан сўнг ҳайдовчининг қора кийинган, юзларига қора ниқоб таққан шериклари машинадан шоишилиб тушиб, бинодан ўзларига керакли нарсани қидира бошлайди. Уларнинг хатти-ҳаракатларини бино қўриқлаш хизмати ходими (ЎзПФЛ бош директори Диёр Имомхўжаев) камералар орқали кўриб қолиб, сигнализацияни босади. Шу вақт вертолёт овози эшитилади.
«Насаф» футболчилари (чапдан) Жавоҳир Сиддиқов ва Алибек Давронов.
Роликнинг охирги қисмида қора фургон ҳайдовчисининг шерикларидан бири (ОКМК футболчиси Санжар Турсунов) қидирганини — шоҳсупада турган Ўзбекистон Кубогини топади.
«Насаф» бош мураббийи Рўзиқул Бердиев.
Шу вақт қаршисидан қора кийинган бошқа бир гуруҳ шахслар аъзоси («Насаф»нинг бразилиялик футболчиси Лима Круз) чиқиб келади, уларни эса боя йўлда қора фургонни таъқиб қилган машина ҳайдовчиси («Насаф» бош мураббийи Рўзиқул Бердиев) кузатиб турган бўлади.
ОКМК футболчиси Санжар Турсунов ва «Насаф» футболчиси Матеус Лима Круз.
Икки томон Кубокни талашишга тайёр турган вақтда хонага қўлида тўп билан ҳозиргина вертолётдан тушган ҳакамлар бригадаси кириб келади. Ролик Ўзбекистон Кубоги финал учрашуви қачон ва қаерда ўтиши ҳақидаги эслатма билан якунига етади.
Муносабат
Айни вақтда, аксарият кузатувчилар, интернет фойдаланувчиларининг аксарияти роликда мураббийлар Миржалол Қосимов ва Рўзиқул Бердиев, шунингдек, ЎзПФЛ раҳбари Диёр Имомхўжаевнинг шахсан ўзи ҳам қатнашганини алоҳида эътироф этган.
«Миржалол акани кўндиришганига қойил. Рўзиқул акани гапиртиришга барибир кўндиришолмаган (балки роль шундай бўлгандир) шекилли», — деб ёзган Шаҳбоз Беғамов видеони «топ даражадаги промо-ролик» дея таърифлаган. «Жилла қурса нималардадир ўсиш борлигидан одам хурсанд бўлади», — деб ёзган «Футгол» канали муаллифи.
«Яхши видео ишланибди. Финалга бўлган қизиқишни оширади. ЧЛдаги натижалар ўз йўлига, ўзимизнинг футбол бошқа масала эканига зўр тарғиб», — дея муносабат билдирган таниқли журналист ва футбол шарҳловчиси Хайрулла Ҳамидов.
Режиссёр Сарвар Каримов роликни улашаркан, уни дўсти Дилмурод Агзамов суратга олганини маълум қилган. Каримовнинг твитига жавобан, интернет фойдаланувчилардан бири бу роликни кўриб энди Ўзбекистон Кубоги финалини кўришга қарор қилганини ёзган.
Яна бир фойдаланувчи эса роликдан 15 сония кесиб олиб, Тошкентни Термиз билан боғловчи халқаро M-39 йўлидаги видеореклама иншоотига чиқаришини айтган. Роликни мақтаган, у ҳақда илик фикр билдирган фаоллар, фойдаланувчилар кўпчиликни ташкил қилади.
Бир қатор кузатувчилар ЎзПФЛнинг видеоси «чала экани»ни айтиб, «тўлиғини бу ерда кўриб олинг» деб Nike’нинг «Joga Bonito — The Miission» рекламасига ҳавола қолдирган. ЎзПФЛ вакиллари «Газета.uz» билан суҳбатда бундай ўзига хос танқидларга тайёр эканликларини, ҳақиқатан ҳам «Nike рекламаларидан илҳомланилгани»ни тан олди, ўз навбатида, ролик «мухлисларга манзур бўлгани ҳолда тарихда қолишига» умид билдирди.
Тренддан қолмайдиган ЎзПФЛнинг роликлари
ЎзПФЛнинг матбуот хизмати ижтимоий тармоқларда фаол ва трендлардан қолишмасликка ҳаракат қилади. Тренддан келиб чиқиб қилинган ишларнинг сўнггиси сифатида Ўзбекистон Суперлигаси клублари мураббийлари ва футболчиларининг Photolab’да ишланган ҳазил суратларини кўрсатиш мумкин.
Ташкилот ўзи ўтказаётган мусобақалар тарғиботи учун мўлжалланган анонс, интро ва ҳисобот видеоларини тайёрлашга алоҳида эътибор қаратади. Хусусан, Суперлиганинг 2022 ва 2023 йилги мавсумлари учун тайёрланган интролар, футзал чемпионати учун ишланган роликлар алоҳида эътиборга молик.
Улар орасида Англия Премьер-лигасининг роликларини эслатадиган видеолар ҳам бор. ЎзПФЛ вакиллари бундай роликларни тайёрлашда Европанинг энг кучли чемпионатлари учун чиқарилган шу каби медиа маҳсулотлардан ўрганишларини яширмайди.
Лига сўнгги йилларда Ўзбекистон Кубогини медиа эътибори нуқтаи назаридан ўзининг энг қизиқарли мусобақаларидан бирига айлантира олди. Масалан, 2022 йили Бухорода бўлиб ўтган финал учрашуви олдидан Кубокнинг Тошкентдан Бухорога сафари, жумладан, Бухородаги сайёҳлар билан танишуви ҳақида ролик эълон қилинган эди.
Шунингдек, 2022 йилги финалга ЎзПФЛнинг ўзи қандай тайёргарик кўргани ва ушбу ўйинда VAR тизими қандай ишлагани ҳақидаги роликлар ҳам алоҳида эътиборга молик.
2023 йилги финал
ЎзПФЛ 2020 йилги мавсумдан бери Кубок финалига мезбонлик қилувчи шаҳарни қуръа ёрдамида аниқламоқда. Шундай қуръа натижасига кўра, 2020 йилги финал Наманганда, 2021 йили Самарқандда, 2022 йили эса Бухорода ўтказилган эди. 2023 йилги финал мезбонлигига Тошкентдаги «Бунёдкор» ва «Жар», Фарғонадаги «Истиқлол» ва Қаршидаги «Марказий» стадионлари даъвогар эди. Якунда қуръа Қаршини танлади.
Ўзбекистон Кубоги финали ўтказилган стадионлар. Иллюстрация: ЎзПФЛ
«Насаф» ва ОКМК ўртасидаги финал учрашуви 12 ноябрь, якшанба куни соат 17:00 да бошланади. Ўйинни Азиз Асимов бошлиқ ҳакамлар бригадаси бошқариб боради. Ўйин учун электрон чипталар сотуви 8 ноябрдан бошланган, 10 ноябрдан стадионнинг ўзида сотиб олиш мумкин бўлади. Чипталар 30 мингдан 100 минг сўмгача бўлган нархда сотувга чиқарилган.
Маълумот учун, ОКМК финалгача асосан қуйи лига вакиллари билан баҳс олиб борган, фақат ярим финалда 2022 йилги финалчи — Наманганнинг «Навбаҳор» жамоасига тўқнаш келиб, пенальтилар сериясидаги ғалаба эвазига финалга чиққан эди. «Насаф» эса ярим финалда Самарқанд «Динамо»сини 2:1 ҳисобида мағлубиятга учратган эди (қайд этиш жоиз, «динамочилар» чорак финалда «Пахтакор»ни мусобақадан чиқариб юборганди).
«Насаф» ва ОКМКнинг Ўзбекистон Кубоги-2023 финалига қадар босиб ўтган йўли. Иллюстрация: ЎзПФЛ
«Насаф» кетма-кет учинчи мавсум Кубок финалига чиқмоқда. Ўтган икки сафарги финал қаршиликлар бир хил — 2:1 ҳисобидаги ғалабалари билан якунига етган эди: 2021 йили «Пахтакор», 2022 йилда эса «Навбаҳор» мағлуб этилганди. ОКМК эса икки йиллик танаффусдан сўнг яна финалда — олмалиқликлар бунгача 2018−2020 йилларда кетма-кет финалга чиққан, ғолиблик учун ҳар сафар «Пахтакор» билан ўйнаган, лекин фақат бир сафар — 2018 йили Кубокни қўлга кирита олганди, холос.
