3 ноябрь куни пойтахтда «III Тошкент Аксилкоррупция форуми» бўлиб ўтди. У Коррупцияга қарши курашиш агентлиги томонидан Коррупцияга қарши курашиш миллий кенгаши, БМТининг Гиёҳванд моддалар ва жиноятчиликка қарши курашиш бошқармаси, БМТ Тараққиёт дастури, АҚШнинг Давлат департаменти Гиёҳванд моддаларни назорат қилиш ва ҳуқуқни муҳофаза қилиш бюроси, Халқаро ҳамкорлик бўйича Германия жамияти, «Минтақавий Мулоқот» халқаро нодавлат ташкилоти ҳамкорлигида ташкил этилди.
Форум доирасида «Газета.uz» мухбири Баҳодир Абдуллаев Коррупцияга қарши курашиш агентлиги директори Акмал Бурханов билан суҳбатда коррупциявий жиноятларнинг қанчаси айнан ОАВ кўмагида аниқланаётгани ҳақида сўради.
«Агар ўтган 3 йил билан солиштирсак, бугунги кунда коррупция йўналишида ОАВ ва ижтимоий тармоқларда чиқаётган ҳар бир материал алоҳида назоратга олиниб, ўрганиляпти. Мен хурсандманки, мана шу ОАВ ва тармоқлар орқали коррупцияга қарши курашиш идоралари томонидан кўплаб коррупцион жиноятлар ва янги коррупцион схемалар фош этилишига эришиляпти», — деди у.
Унинг сўзларига кўра, бу биринчидан, албатта янги платформаларнинг яратилиши бўлса, иккинчидан журналистлар ва жамоатчилик томонидан коррупцияга нисбатан тоқатсиз муносабат шаклланганидан далолат беради.
«Бугунги кунда журналистлар ҳар қандай масалани очиб, чиқара оляпти. Бу бўйича албатта тегишли ишлар амалга ошириляпти. Агар фоизи ҳақида гапирадиган бўлсам, журналистлар томонидан кўтарилаётган масалалар сони кундан-кунга ошмоқда, салмоғи ҳам катта. Энг аҳамиятли томони журналистлар турли суриштирувлар ўтказиш орқали коррупциянинг янги кўринишларини очиб беришда бизга ёрдам беряпти. Биз буни кўряпмиз ва улар жиноят сифатида эътироф этиляпти», — деди Акмал Бурханов.
Антикоррупция агентлиги раҳбари бундан кейин ҳам журналистлар фаолияти қўллаб-қувватланиши таъкидлаб, улар коррупцион ҳолатларни аниқлашда ўз ҳиссаларини қўшишларига ишонч билдирди.
