2 ноябрь куни БМТ Бош Ассамблеяси 31 марта АҚШни Кубага нисбатан иқтисодий, тижорат ва молиявий санкцияларни бекор қилишга чақирувчи резолюцияни қабул қилди, деб хабар қилди ташкилот матбуот хизмати.
Ҳужжатни 187 давлат, жумладан Ўзбекистон ҳам қўллаб-қувватлади. Икки давлат — АҚШ ва Исроил қарши овоз берди, Украина бетараф қолди.
БМТ Бош Ассамблеяси 31 йил кетма-кет блокадани бекор қилишга чақирувчи резолюцияларни қабул қилиб келмоқда. 1992 йилда уни 59 давлат қўллаб-қувватлаган бўлса, 2017 йилда — 191 та, ўтган йили — 185 та, бу йил эса — 187 та давлат резолюцияни ёқлаб овоз берган. Фақатгина 2016 йилда АҚШ «қарши» овоз бермаганди, ўша йили у бетараф қолган. Бироқ, кейин расмий Вашингтон аввалги позициясига қайтди.
Резолюция муаллифлари ташкилотга аъзо давлатлар томонидан 1996-йил 12 мартда Қўшма Штатларда қабул қилинган Хелмс-Бертон қонуни сифатида танилган, экстратерриториал оқибатлари бошқа давлатлар суверенитетига таъсир кўрсатадиган, юридик ёки жисмоний шахсларнинг қонуний манфаатлари, уларнинг юрисдикцияси ва савдо ва навигация эркинлигини чеклайдиган қонунлар ва қоидаларни қўллашини қоралади. Резолюция барча давлатларни бундай чоралар ва қонунларни «қабул қилиш ва қўллашдан тийилиш»га чақиради.
Ассамблеяда сўзга чиққан делегатлар Кубага қарши эмбаргонинг ноқонуний эканлигини таъкидлаб, бу БМТ Низомини қўпол ва мунтазам равишда бузиш эканлигини таъкидладилар. Улар блокаданинг Куба халқига етказаётган зарарига, уларни асосий даромад ва асосий эҳтиёжлар, жумладан, дори воситаларидан маҳрум қилишига ишора қилдилар.
Куба ташқи ишлар вазири Бруно Родригес Парилла АҚШнинг унинг мамлакатига қарши иқтисодий санкциялари Куба халқининг инсон ҳуқуқларининг кенг миқёсда бузилишига олиб келаётганини айтди. Унинг сўзларига кўра, аҳолига зарур товарлар, озиқ-овқат, саноат ускуналари, чорвачиликни ривожлантириш учун зарур маблағ етишмайди.
«Куба Америка компаниялари ва уларнинг учинчи мамлакатлардаги шўба корхоналаридан асбоб-ускуналар, технология, тиббий асбоб-ускуналар ва фармацевтика маҳсулотларини харид қила олмайди», деб таъкидлади вазир. Шу сабабли, унинг сўзларига кўра, Куба сотувчиларга ортиқча тўлашга ёки дори-дармонларни самарасиз аналоглари билан алмаштиришга мажбур.
Ташқи ишлар вазирининг таъкидлашича, ҳатто пандемия даврида ҳам тиббий кислород сотиб олиш учун АҚШ ҳукуматининг махсус рухсати талаб қилинган. Бу, деди у, Кубага нисбатан санкциялар сиёсатининг «ғайриинсоний моҳиятини» кўрсатади.
Америка Қўшма Штатлари вакили Пол Фолмсби йиғилганларни Вашингтон Куба халқининг эркинлик, фаровонлик ва янада муносиб келажакка интилишида улар билан бирга эканлигига ишонтирди. Унинг сўзларига кўра, санкциялар демократия ва инсон ҳуқуқларини ҳимоя қилиш тамойилларини ривожлантириш воситаларидан биридир.
Қўшма Штатлар Куба халқи дуч келадиган қийинчиликларни тан олади. Шу сабабли, озиқ-овқат, дори-дармон ва бошқа гуманитар товарлар санкциялар режимидан чиқариб ташланган, деди у.
Эслатиб ўтамиз, Ўзбекистон 1997 йилда АҚШ ва Исроил билан бирга резолюцияга қарши овоз берган, 1998, 1999 ва 2002 йилларда бетараф қолган.
