Октябрь ойининг охирги кунида ёғиб ўтган ёмғир ва совуқдан сўнг ноябрь ойи қуруқ об-ҳаво билан бошланади, дея хабар бермоқда Ўзгидромет хизмати агентлиги.
Ноябрь одатда ҳароратнинг кескин ўзгариб туриши билан тавсифланади. Ойнинг ўртача ҳарорати октябрь ойига нисбатан 5−7 даража паст бўлади. Бу йилги ноябрнинг биринчи беш кунлигида Ўзбекистоннинг барча ҳудудларида ҳаво бироз булутли бўлади, баъзида ўзгариб туради, ёғингарчилик кутилмайди. Шамол ўртача тезликда эсади.
1 ноябрь куни кундузи ҳаво ҳарорати +17…+19 даража бўлади, 2−5 ноябрь кунлари +21…+24 даражагача аста-секин кўтарилади. Фақат кечаси ва эрталаб +5…+10 даража бўлган ҳарорат билан салқин бўлиши мумкин.
Кейинчалик, ойнинг охиригача, Ўзгидрометнинг дастлабки баҳолашига кўра, республика ҳудудининг катта қисмида ҳарорат кечалари +5…+10 даражадан 0…+5 даражагача, кундуз кунлари +15…+20 даражадан +7…+12 даражагача ўзгариб туриши кутилмоқда. Совуқ ҳаво даврларида эса кечаси ва эрталаб 0…-2 даражагача бўлиши мумкин.
Республика шимолида анча паст ҳарорат фонида кечалари +2…+7 даражадан −2…−7 даражагача, кундуз кунлари +10…+15 даражадан +7…12 даражагача ўзгариб туриши кутилмоқда.
Ноябрь ойида ёғингарчилик октябрь ойига нисбатан тез-тез, давомий ва жадал бўлади. Ноябрь ойида ёмғир қорга айланиши кам учрайдиган ҳолатдир. Ушбу ноябрда ёғингарчилик меъёр атрофида, баъзи жойларда меъёрдан кўп бўлиши кутилмоқда. Ёғингарчилик асосан ёмғир кўринишида ёғади, совуқ даврларда эса қорга айланади.
Ўтган йилларда ноябрь ойи
Одатда республика ҳудудининг катта қисмида ойнинг биринчи ярмида кундузги ҳарорат +15…+20 даража, иккинчи ярмида эса +10…+15 даража атрофида бўлади. Кўпинча ойнинг бошида кундузи ҳаво +22…+27 даражагача исийди.
Мутлақ максимал ҳарорат +30…+33 даражани, Қорақалпоғистон Республикаси, Хоразм вилояти ва Фарғона водийсида +26…+28 даражани ташкил этади.
Инфографика: Ўзгидромет.
Ўтган асрнинг ўрталаригача энг совуқ ноябрь ойларида ҳаво ҳарорати баъзан −19…−24 даражагача, шимолда −25…−27 даражагача, энг чекка жанубда −10…−15 даражагача пасайган. Сўнгги 50 йил ичида бундай совуқлар ноябрь ойида кузатилмаган. 1961−2022 йиллар даври учун мутлақ минимал ҳарорат −10…−15 даражани, шимолда −20…−22 даражани ташкил этган.
Тоғли ҳудудларда биринчи қор қоплами ҳосил бўлади, 2000 метрдан юқори баландликларда ой охирига унинг баландлиги 25−40 см га етади.
Барча кузатув йиллари учун ҳудуднинг катта қисмида энг кўп ёғингарчилик 2011 йил ноябрь ойида кузатилган. Ушбу йилда ноябрь ойида ёғингарчилик 3−3,5, энг чекка жанубда эса 4−7 ойлик нормагача бўлган. Масалан, Тошкентда 11 кунлик меъёрга нисбатан 19 кун ёғингарчилик бўлиши кузатилган, дейилади Ўзгидромет хабарида.
Аммо метеорологик кузатувлар тарихида ноябрь ойида ёғингарчилик меъёрдан 30 фоиз кам бўлган йиллар кузатилган. Охирги марта бундай ноябрь 2002 йилда бўлган.
