Президент Шавкат Мирзиёев Туркиянинг миллий байрами — Республика эълон қилинган куннинг 100 йиллиги муносабати билан ушбу мамлакат президенти Режеп Таййип Эрдоғанга табрик йўллади. Бу ҳақда давлат раҳбари матбуот хизмати хабар бермоқда.
Мактубда халқлар ўртасидаги умумий тил, урф-одатлар, ўзаро ҳурмат ва ҳамжиҳатлик тамойилларига асосланган кенг қамровли стратегик шериклик алоқалари сўнгги йилларда «сифат жиҳатидан юксак босқичга кўтарилиб, муносабатлардаги янги тарихий даврни бошлаб бергани» таъкидланган.
«Насиб этса, сиз билан биргаликда халқларимизнинг умумий равнақини таъминлаш йўлида келишиб олган барча йирик лойиҳа ва аниқ дастурларни тўлиқ амалга оширамиз ҳамда кўзлаган улкан марраларимизга албатта эришамиз», — дейилади қутловда.
Шавкат Мирзиёев Туркия етакчиси ва оила аъзоларига сиҳат-саломатлик, фаровонлик ва бахт-саодат, масъулиятли давлатчилик фаолиятида янги зафарлар, қардош турк халқига эса тинчлик-омонлик, бардавом тараққиёт ва юксалишлар ёр бўлишини тилади.
Маълумот учун, Туркия 1923 йил 29 октябрда Республика сифатида эълон қилинган. Мустафо Камол Отатурк Туркия Республикасининг биринчи президенти этиб сайланган.
