Қозоғистон президенти Қосим-Жомарт Тоқаев мамлакатда «қонун ва тартиб диктатураси»ни таъминлашга чақирди ва радикализм ва ҳуқуқий нигилизмнинг ҳар қандай кўринишига нисбатан муросасиз сиёсат олиб боришга ваъда берди. Бу ҳақда у 24 октябрь — Республика куни муносабати билан қилган нутқида айтиб ўтди. Нутқ матнини Қозоғистон раҳбарининг матбуот хизмати эълон қилди.
«Давлатчилигимиз асосларини мустаҳкамлаш учун қонун устуворлигини таъминлаш ниҳоятда муҳим… Қонунсизлик, тартибсизлик, маданиятсизлик мамлакатни йўқ бўлиб кетишга етаклайди. Тартиб бор жамият тараққий этган бўлади, бу — аксиома. Агар ҳар бир фуқаро мамлакат қонунларини ҳурмат қилса, бирдамлик, фаровонлик бўлади. Бошқача қилиб айтганда, ҳамма нарсани қонун бўйича қилсак, ҳаммаси жойида бўлади», — деди Тоқаев.
«Биз жамиятни изчил трансформация қилиш, демократик тамойилларни жорий этиш йўлидан оғишмай, олдинга боряпмиз. Шу билан бирга, дунёда сиёсий ва иқтисодий турбулентлик кучаяётган бир шароитда мамлакатда қонун ва тартиб диктатурасини таъминлаш жуда муҳим», — деди Қозоғистон президенти.
У давлат радикализм, экстремизм, ҳуқуқий нигилизм ва маиший вандализмнинг ҳар қандай кўринишларига тоқатсиз сиёсатини «қатъий олиб боришини» таъкидлади. «Агрессия ва нафрат риторикаси, ижтимоий меъёрларни бузиш, зўравонликка даъватлар, фуқароларнинг қадр-қимматини камситувчи ҳаракатлар — буларнинг ҳеч бирига жамиятимизда ўрин бўлмаслиги керак», — деди Тоқаев.
Қозоғистон раҳбари ҳукумат қонунга зид бўлган, фуқароларни ажратадиган ва мамлакат барқарорлигига путур етказадиган «ҳар қандай сўз ва ҳаракатларни қатъий бостиришини» таъкидлади.
«Бу чизиқдан ўтганлар ўзини ҳам давлатга, ҳам жамиятга қарши қўяди. Буни барча фуқаролар, айниқса, жамоат арбоблари ва „фикр етакчилари“ деб аталадиганлар яхши тушуниши керак», — дея огоҳлантирди президент.
Тоқаев ўз нутқида, шунингдек, Қозоғистонда сўнгги икки йил ичида амалга оширилган ислоҳотлар «халқнинг сиёсий менталитетини сезиларли даражада ўзгартирганини» таъкидлади.
«[Одамлар], ишончим комилки, давлатнинг аввалги бошқарув усулларига қайтишига энди йўл қўймайди. Ислоҳотлар натижалари ортга қайтмайди. Улар, албатта, давом этади ва давлатимиз қиёфасини бутунлай ўзгартиради», — деди у.
Шу билан бирга, Қозоғистон президенти ислоҳотларни амалга оширишда, биринчи навбатда, «ички сиёсий барқарорликни таъминлаш муҳимлиги» ҳақида ўйлаш кераклигини қўшимча қилди.
«Акс ҳолда, Қозоғистон давлатчилиги халқимиз келажаги даҳшатли оқибатларга олиб келадиган хавфга учраши мумкин. Айнан шунинг учун мен мамлакатнинг барча фуқаролари қонун ва тартибга истисносиз риоя этиши зарурлиги ҳақида гапиряпман», — деди Тоқаев.
