Turkish Airlines авиакомпаниясининг THY-371 Тошкент-Истанбул рейси техник сабабларга кўра бекор қилинди. Бу ҳақда Uzbekistan Airports матбуот хизмати хабар бермоқда.
Дастлаб, рейс бир неча соатга кечиктирилди. Вақт ўтгач авиаташувчи рейсни бекор қилишни маъқул деб топди.
Жадвалга кўра, бортида 265 нафар йўловчи бўлган А-333 самолёти Тошкент вақти билан 02:35 да ҳавога кўтарилиши керак бўлган. Бироқ самолётда техник носозлик аниқлангани сабабли парвоз кечиктирилган, йўловчилар кутиш залига жойлаштирилган ва иссиқ овқат билан таъминланган.
Якшанба куни эрталаб авиакомпания ушбу рейсни бекор қилишга ва йўловчиларни бошқа рейсларда Истанбулга ташишга қарор қилган. Йўловчиларга иссиқ овқат ва меҳмонхонада жойлашиш ҳам таклиф қилинган.
