Бен Уоллес Буюк Британия мудофаа вазири лавозимини тарк этди, у 2019 йил июлидан бери бу лавозимни эгаллаб келаётганди. Унинг бош вазир Риши Сунак номига ёзган истеъфоси ҳақидаги мактуби ҳукумат сайтида эълон қилинган.
2023 йил июль ойида Уоллес Сунак томонидан режалаштирилган навбатдаги ўзгаришлар пайтида Вазирлар Маҳкамасидан кетиш ниятида эканини эълон қилганди. Кейинроқ вазир сиёсатдан чарчаганини қайд этган. У ўз мактубида ўта бандлиги туфайли ҳаётнинг эътиборсиз қолдирган соҳаларига вақт ажратишни ва «ўзи учун янги имкониятларни кашф қилишни» истаётганини такрорлаган.
Уоллес бош вазирга қўллаб-қувватлагани ва дўстона муносабати учун миннатдорлик билдириб, ҳукумат раҳбари ва унинг кабинетини қўллаб-қувватлашда давом этишини таъкидлади. Шунингдек, у Британия Қуролли кучлари бутун дунёда ҳурмат қилинишини ва Украинадаги можаро бошланганидан кейин «бу ҳурмат янада кучайганини» таъкидлади.
Жавоб мактубида Вазирлар Маҳкамаси раҳбари Уоллесга вазирлик лавозимидаги фаолияти учун миннатдорлик билдириб, у биринчилардан бўлиб Москванинг Украинага нисбатан «ҳақиқий ниятларини кўра олгани» ва уруш бошланишидан олдин Киевга қурол етказиб бера бошлаганини таъкидлади.
«Мамлакатимиз Россиянинг Украинага бостириб киришига жавоб қайтаришда бошқаларга ўрнак бўлганидан фахрланаман. Сиз Украинага мамлакатимизда ҳам, хорижда ҳам кўрсатилаётган ёрдамни кучайтиришда ҳал қилувчи ролни ўйнадингиз», — деб ёзади Сунак ва у 53 ёшли Уоллеснинг деярли 9 йил юқори давлат лавозимларида ишлаганидан кейин нафақага чиқиш истагини тўлиқ тушунишини таъкидлаб ўтди.
Уоллес 2016—2019 йилларда Буюк Британия ички ишлар вазири ўринбосари бўлган. 2019 йил 24 июлдан Мудофаа вазирлиги раҳбари лавозимига киришган.
Мудофаа вазирлигининг янги раҳбари
Бош вазир Риши Сунак янги мудофаа вазирини тайинлади. Бу лавозимни шу вақтгача Энергетика вазирлигини бошқарган Грант Шаппс эгаллади.
Фото: Reuters
Х ижтимоий тармоғида (собиқ Twitter) Шаппс унинг раҳбарлигида Британия Мудофаа вазирлиги Украинага ёрдам беришда давом этишига ваъда берди.
Шаппс ўтган ҳафтада Киевга энергетика хавфсизлиги вазирлиги раҳбари сифатида ташриф буюрганди. Ташриф чоғида у Буюк Британия Украинанинг энергетик хавфсизлигини мустаҳкамлаш учун 192 миллион фунт стерлинг миқдорида кредит кафолати беришини айтган.
