Ўзбекистон президенти Шавкат Мирзиёев Венгрия бош вазири Виктор Орбаннинг таклифига биноан жорий йил 19−20 август кунлари амалий ташриф билан Будапешт шаҳрида бўлади. Бу ҳақда давлат раҳбари матбуот хизмати хабар қилди.
Ташриф дастурига мувофиқ, давлат раҳбари Венгрия бош вазири билан музокара ўтказади, унда мамлакатларимиз ўртасидаги амалий ҳамкорликнинг дастур ва лойиҳаларини илгари суриш масалалари кўриб чиқилади.
Ўзбекистон президенти фахрий меҳмон сифатида Венгрия давлат байрами — авлиё Иштван кунига бағишланган тадбирларда иштирок этади ҳамда Будапештда ўтаётган енгил атлетика бўйича жаҳон чемпионатининг эркаклар ўртасидаги югуриш мусобақалари финалига ташриф буюради.
Эслатиб ўтамиз, Шавкат Мирзиёев 2022 йил 3−4 октябрь кунлари расмий ташриф билан Венгрияда бўлган эди.
