ЖССТ 7 август куни Ироқда Cold Out (парацетамол ва хлорфенираминнинг комбинациясидан иборат) сиропининг битта партияси сифат талабларига жавоб бермаганини билдириб, ушбу дори хавфидан огоҳлантирди.
Парацетамол ва хлорфенираминнинг комбинацияланган сироплари шамоллаш ва аллергия аломатларини даволаш ва енгиллаштириш учун ишлатилади.
Cold Out сиропи намунаси Ироқдаги лаборатория таҳлилига топширилганда намунада қабул қилиб бўлмайдиган миқдорда диэтиленгликоль (0,25%) ва этиленгликоль (2,1%) борлиги аниқланди. Улар учун мақбул хавфсизлик чегараси 0,10% дан ошмаслиги керак.
Ушбу огоҳлантириш фонида ССВ ҳузуридаги Фармацевтика маҳсулотлари хавфсизлиги маркази матбуот хизмати ўз муносабатини билдириб ўтди.
Хабарга кўра, Cold Out сиропи Fourrts Laboratories (Ҳиндистон) томонидан Dabilife Pharma учун ишлаб чиқарилган бўлиб, унинг таркибида токсинлар борлиги қайд этилган.
Шунингдек, Ҳиндистон Соғлиқни сақлаш вазирлиги маълумотига кўра, мазкур дори воситаси Ироқда ўтказилган алоҳида синовларда сифат талабларига жавоб берамагач, эркин савдодан қайтариб олинган.
Марказ мазкур дори Ўзбекистонда давлат рўйхатидан ўтказилмаганини маълум қилиб, ижтимоий тармоқларда тарқалаётган хабарлар юзасидан фуқаролар хавотирга тушмаслигини билдирди.
«2023 йил февраль ойидан бошлаб юртимизда ишлаб чиқарилаётган ва мамлакатимизга кириб келаётган сироп шаклдаги дори воситалари таркиби диэтиленгликоль (ДЭГ) ва этиленгликоль (ЭГ) заҳарли моддалари бўйича чуқур текширилиб, Соғлиқни сақлаш вазирлиги томонидан бу борада қатъий назорат ўрнатилган», — дейилади хабарда.
Эслатиб ўтамиз, Ҳиндистонда Ўзбекистонда йил бошида болаларнинг оммавий ўлимига алоқадор йўтал сиропини ишлаб чиқарган компания — Marion Biotech лицензиясидан маҳрум бўлган. «Док-1 Макс» сиропидан Ўзбекистонда 20 дан ортиқ бола вафот этган.
Шунингдек, Marion Biotech компанияси ўз маҳсулотларида ювиш воситалари, антифриз, бўёқлар ва бошқа маҳсулотларда қўлланадиган заҳарли модда — саноат пропиленгликолидан фойдаланган бўлиши мумкинлиги ҳам хабар қилинган.
