31 июль куни эрталаб Россия армияси Украинанинг Днепропетровск вилоятидаги Кривой Рог шаҳрига ракета ҳужуми уюштирди. Украина Ички ишлар вазирлиги раҳбари Игор Клименконинг хабар беришича, ракеталардан бири кўп қаватли турар-жой биносига, иккинчиси эса ўқув муассасасининг тўрт қаватли биносига келиб тушган.
«Иккинчи ракета турар-жой биносининг 4-қаватидан 9-қаватигача бўлган қисмини вайрон қилди. Ёнғин чиқди», — дейилади хабарда.
Фавқулодда хизматлар ёнғинни ўчириш ва вайроналарни саралаш ишларини олиб бормоқда, унинг остида одамлар бўлиши мумкин, дея қўшимча қилди у.
Украина фавқулодда вазиятлар давлат хизматининг сўнгги маълумотларига кўра, ҳужум натижасида тўрт киши ҳалок бўлган, яна 43 киши, жумладан, тўрт бола яраланган.
Кривой Рог ҳарбий маъмурияти раҳбари Александр Вилкулнинг аниқлик киритишича, ракеталардан шаҳарнинг марказий қисмидаги аҳоли зич жойлашган ҳудудига зарба берилган.
Украина президенти Владимир Зеленский Кривой Рогга қилинган ҳужумга муносабат билдириб, зарба оқибатлари акс этган лавҳаларни эълон қилди. «Сўнгги кунларда душман ўжарлик билан шаҳарларга, шаҳарлар марказларига зарба бермоқда. Фуқаролик объектлари ва уй-жойларни ўққа тутмоқда. Аммо бу террор бизни қўрқитмайди ва синдирмайди. Биз ишлаймиз ва халқимизни қутқарамиз», — деб ёзади у.
30 июлга ўтар кечаси Россия пойтахтидаги «Москва Сити» бизнес марказига иккита дрон ҳужум қилди. Москва мери Сергей Собянин «иккита офис минорасининг жабҳалари бироз шикастланганини», қурбонлар ва жароҳатланганлар йўқлигини айтди. BBC хабарига кўра, шикастланган бинолардан бирида Россиянинг қатор вазирликлари идоралари жойлашган.
Май ойининг бошидан бери Москвага тўрт марта учувчисиз учиш аппаратлари томонидан ҳужум уюштирилди. Украина бу ҳужумлар учун жавобгарликни ўз зиммасига олмади.
