Тошкент вилояти Юқори Чирчиқ туманида диний материалларни тарқатиб келган йигитнинг озодиги 4 йилга чекланди. Бу ҳақда Zo‘r TV каналининг Bu kun дастурида хабар берилди.
Фуқаро етарли диний билимга эга бўлмай туриб, Telegram мессенжери орқали Ўзбекистонда фаолияти тақиқланган ақидапарастлик ғоялари билан йўғрилган диний мазмундаги маърузаларни мунтазам эшитиб, видеотасвирларни кўрган.
Уларни телефонига юклаб олиб, Telegram орқали бошқаларга тарқатган. Ҳолат юзасидан жиноят иши жиноят ишлари бўйича Чирчиқ шаҳар судида кўриб чиқилган.
«Болаларингизнинг қўлларига телефон берганингизда эҳтиёт бўлинглар. Қандайдир маъруза, видеоларни телефонида сақламасин. Бунинг оқибати яхшиликка олиб келмайди. Битта оиланинг, фарзанднинг келажагини бутунлай барбод қилиб қўйиши мумкин», — дейди айбланувчининг онаси.
Айбланувчи Жиноят кодексининг 244−1-моддаси (Жамоат хавфсизлиги ва жамоат тартибига таҳдид соладиган материалларни тайёрлаш, сақлаш, тарқатиш ёки намойиш этиш) 3-қисми «г» банди ва 159-моддаси (Ўзбекистон Республикасининг конституциявий тузумига тажовуз қилиш) 1-қисмида назарда тутилган жиноятни содир этганликда айбли деб топилган. Тайинлаган жазоларга қисман қўшиш йўли билан унга 4 йил муддатга озодликни чеклаш жазоси тайинланган. Унинг сутканинг соат 22:00дан 06:00га бўлган вақт оралиғида уйдан чиқиши чекланган.
