«O‘rikguli» номи остида фаолият олиб борувчи экоблогер Мўътабар Хушвақтова 3 июль — Халқаро пластик пакетларсиз кунга бағишланган видеони эълон қилди. Шу куни блогер ноодатий тарзда — пластик пакетлардан тайёрланган кийимни кийганча марказий кўчаларни айланди. Бекатда туриб, автобус ва метродан фойдаланди. Овқатланиш шохобчаларида бўлди.
«Газета.uz» экоблогерларнинг ушбу ҳаракатидан мақсади билан қизиқди.
Унинг таъкидлашича, пластик халталардан воз кечиш куни экологик тоза турмуш тарзини бошлаш учун жуда яхши сабаб ҳисобланади.
«Одамлар ҳайрон қолишди. Лекин кўпчилиги савол бермади, қизиқиш билдирганларига эса маълумот бердим. Бугун пакетлардан воз кечиш куни экани, бир киши йилига 650−1000 та пакет ишлатаётганини айтдим», — деди блогер.
Унинг айтишича, рақамлар кичик кўриниши мумкин. Ўша куни блогернинг эгнидаги кийимда 250 та пакет бўлган, бу орқали одамларни бир киши бир йилда шундан 3 баравар кўп пакет ишлатишини тасаввур қилиб кўришга ундамоқчи бўлган.
Экофаол ушбу ғоя унда ярим йилдан бери борлиги, аммо айнан 3 июль санасини кутганини билдирди.
«Ҳаракатим орқали одамларнинг пакетлардан воз кечишини, унинг ўрнига кўп марталик шоперлар, экосумкалардан фойдаланишини кутяпман. Ёки, халқ тилида айтганда, бозор халта, рўзғор халта деган нарсалар бор. Олдинлари одамлар оддийгина бозор халталарни тикиб, ўшалардан фойдаланган. Қишлоқ жойларга борсангиз, ҳалигача гуруч, ун ва бошқа нарсалар ўз халтасида туради. Ёки одамлар бозорга борганда олган нарсаларини халтага солиб, уйига олиб келади. Ҳар доим эко альтернатив бор, фақат одамлар буни танлаши керак», — дея таъкидлайди Мўътабар Хушвақтова.
«Полиэтилен пакетлардан воз кечишда ҳукумат Қирғизистон каби самарали, қатъий ечимни бериши керак, деб ўйлайман», — дейди экоблогер. Маълумот учун, Қирғизистон полиэтилен пакетларни ишлаб чиқариш, сотиш ва ишлатишдан бутунлай воз кечмоқчи. Тегишли қонун Қирғизистон парламенти томонидан учинчи ўқишда қабул қилинган ва давлат раҳбарига имзолаш учун юборилган. 2024 йилдан республикада пакет ишлаб чиқариш тўхтатилиши мумкин.
«Пластик пакетлар жуда ҳам зарарли, уларни қайта ишлаш ечим эмас, улар 3−4 марта ишлангач, барибир чиқиндига чиқади. Ёки кўп пластик пакетларни қайта ишлаб ҳам бўлмайди», — дея таъкидлади у.
Бундан аввалроқ «Газета.uz» журналисти Миролим Исажонов ҳам экологияни асрашга чақирувчи акция ўтказганди.
«Она табиат биз чиқарган миллиардлаб тонна чиқиндиларни кўтариб турибди. Мен ҳам одамлар кундалик ҳаётида энг кўп фойдаланадиган маҳсулотлардан чиққан пластик чиқиндиларни кўтариб, танамда ҳис қилиб кўриш ҳам шу кийимни кийишга қарор қилдим», — деган журналист ўз ҳаракатларини изоҳлаб.
«O‘rikguli» бу акция ҳақида гапирар экан, «жуда креатив ғоя, буни қўллаб-қувватлайман», — дея таъкидлади.
