Туркияда 13 давлатнинг 40 дан ортиқ жамоалари иштирокида ўтказилган «Энг илғор мерган» мусобақасида Мудофаа вазирлигининг мерганлар жамоаси иккинчи ўринни эгаллади,дея хабар бермоқда вазирлик матбуот хизмати.
Испарта шаҳридаги «Командо» тоғ ўқув машқлар марказида ўтказиган мусобақада Испания, Покистон, Қатар, Бирлашган Араб Амирликлари сингари ўндан ортиқ давлат вакиллари иштирок этган.
Мусобақа иштирокчилари 5 та гуруҳга бўлиниб, бир-биридан мураккаб 14 та шарт бўйича баҳс олиб борган. Хусусан, узоқ масофадан нишонларни излаб топиш ва яксон қилиш шартида мерганлар 2 минг метр масофада жойлашган шартли душман гуруҳи орасидан асосий нишонни аниқлаб топиши ва биринчи уринишда уни яксон этиши лозим бўлган. Ҳабийлар нишонни муддатидан олдин йўқ қилган.
Қайиқдан ва миноралардан ўқ отиб оролни ҳимоя қилиш, вертолёт ва ердан жанг олиб бориб, ярадорни эвакуация қилиш, ҳаракатланувчи нишонларни пистолетда яксон этиш, тунги вақтда магнит азимути бўйича ҳаракатланиш каби қатор шартлар ҳам реал жанг вазиятига яқинлаштирилган ҳолда олиб борилган.
Ўзбекистонлик ҳарбийлар, айниқса, тоғ тепасидан қияликка қараб жанг олиб бориш, зарарланган ҳудудда газниқоб тақиб, нишонларни мўлжалга олиш шартларида барча жамоаларни ортда қолдириб, рекорд натижаларни қайд этган.
Қарийиб 10 кун давом этган беллашувларда хорижий давлат армияларининг 42 та жамоаси ичида Мудофаа вазирлиги ҳарбий хизматчилари фахрли 2-ўринни қўлга киритган. Шоҳсупанинг биринчи ва учинчи ўринлари мезбон давлат вакилларига насиб этган.
«Бундай халқаро мусобақаларда иштирок этиш ҳарбийларимизнинг жанговар тайёргарлигини ошириш, билим ва тажриба алмашишда муҳим ўрин тутади», — дейилади хабарда.
