Тошкент шаҳри Мирзо Улуғбек туманида журналистга қўполлик қилган шахсга нисбатан 5 сутка маъмурий қамоқ жазоси тайинланди, дея хабар бермоқда Тошкент шаҳри судлари матбуот хизмати.
Журналист Нозим Тешаевнинг «Газета.uz»га маълум қилишича, 3 июнь куни туманнинг Осиё кўчасидаги кўп қаватли уйлардан бирининг аҳолиси MY5 телеканалига мурожаат қилиб, 9 қаватли уйнинг биринчи қавати бузилиб, дорихона қурилаётгани, бино асосий деворларидан бири эса бузиб бўлинганини маълум қилган. Телеканал журналисти ҳолатни ёритишга борганда 1993 йилда туғилган М.Я. унга қаршилик кўрсатган ва журналист билан оғзаки жанжаллашган. Унинг қўшимча қилишича, бузиш учун рухсатнома бўлмаган.
Тармоқларда тарқалган видеога кўра, журналист бу шахсдан жараённи бошлаш учун рухсатнома бор-йўқлигини сўраган. У эса камерани ўчириб гаплашишни айтган. Оператор журналистнинг талаби билан ҳолатни тасвирга олишда давом этган. Бунга М.Я. қаршилик кўрсатган.
«Нимани олади? Мени олавер дейдиган сен кимсан?! Мазангни қочириб ташлайман ҳозир. Бу ерда турма», — дея ҳақоратли сўзлар ишлатган у.
5 июнь куни очиқ суд мажлисида М.Я.га оид маъмурий ҳуқуқбузарлик тўғрисидаги иш кўриб чиқилди. Хусусан, жиноят ишлари бўйича Мирзо Улуғбек тумани суди қарорига кўра, у Маъмурий жавобгарлик тўғрисидаги кодекснинг 183-моддаси (Майда безорилик)да назарда тутилган ҳуқуқбузарликни содир қилган деб топилиб, унга 5 сутка маъмурий қамоқ жазоси тайинланди.
«Ушбу қарордан норози тарафлар қонунда белгиланган тартиб ва муддатда Тошкент шаҳри судининг апелляция инстанциясига шикоят бериш ва протест билдиришга ҳақлилиги маълум қилинади», — дейилади хабарда.
