Фанлар академиясида янгиланган ва лотин ёзувига асосланган ўзбек алифбосида илк бор чоп этилган «Ўзбек тилининг изоҳли луғати» китобининг тақдимоти ўтказилди.
2020 йилда нашр этилган «Ўзбек тилининг изоҳли луғати» кирилл ёзувида 5 жилддан иборат бўлган бўлса, бу нашр 6 жилддан иборат ва унга 5000 га яқин янги сўз (жами 80 мингдан ортиқ сўз) киритилган.
Изоҳли луғат Вазирлар Маҳкамаси ҳузуридаги Ўзбек тилини ривожлантириш жамғармаси, Фанлар академияси ҳамда Ғафур Ғулом номидаги нашриёт-матбаа ижодий уйи ҳамкорлигида тайёрланган. Изоҳли луғатнинг дастлабки жилдларини тайёрлашда марҳум олимлар — академик Азим Ҳожиев, академик Тўра Мирзаев, академик Эрнис Бегматов бевосита иштирок этган.
Шунингдек, Ўзбек тилини ривожлантириш жамғармаси маблағлари ҳисобидан «Ўзбек халқ сўзлари», «Ўзбек тилининг катта имло луғати», «Ўзбек тили фразеологик луғати», «Ўзбек тили синонимларининг катта изоҳли луғати», «Ўзбек тилининг ўқув имло луғати», «Ахборот технологиялари атамаларининг изоҳли луғати», «Ўзбек халқ паремаларининг синонимик изоҳли луғати», «Нонвойчилик терминларининг изоҳли луғати» китоблари ҳам тайёрланиб, чоп этилган.
Аввалроқ «Газета.uz» 2006 йилда Филология фанлари номзоди Суюн Қораевнинг ўзбек тили бойлиги, бироқ луғат қашшоқлигини танқид қилган фикрларини эълон қилганди.
Дарҳақиқат, кўп тилли бу курраи заминда ўз тилини аъло даражада билган ва кўп тилни пухта ўзлаштирган халқ ютади. Aгар тилга ҳозргидек муносабат давом этаверса, бир неча йилдан кейин сўз бойлигимиз ёнга солиб юрадиган луғатга жо бўлади-қолади, деб ёзганди ўша мақоласида Суюн Қораев.
