Озарбайжон пойтахти Бокуда старт олган таэквондо WT бўйича жаҳон чемпионатида ўзбекистонлик Улуғбек Рашитов (-68 кг) бронза медалга эга чиқди. Бу ҳақда МОҚ матбуот хизмати хабар бермоқда. У мусобақанинг биринчи кунида яқори рейтинги сабаб биринчи даврадан эркин ўтди. Илк жангини эса Малавилик Жозеф Фирига қарши бошлади ва 2 раундни муддатидан аввал якунлади.
Олимпия чемпиони кейинги жангда тунислик Ясир Аоунини мусобақадан чиқариб юборди. Ундан сўнг, туркиялик Ферҳат Кавуратни енгиб, чорак финалга чиқди. Чорак финалда эса Рашитов грециялик таэквондочи Константинос Чамалидисни енгиб, ярим финал йўлланмасини қўлга киритди.
Финал йўлланмаси учун кечган баҳсда ўзбекистонлик спортчи кореялик Хо Жун Жин билан тўқнаш келиб, 1:2 ҳисобида енгилди ва турнирни учинчи ўрин билан якунлади. Унинг рақиби эса кумуш медаль олди. У финалда британиялик Бредли Синденга мағлуб бўлди.
Совриндорлар (-68 кг):
- Бредли Синден (Буюк Британия)
- Хо Жун Жин (Жанубий Корея)
- Улуғбек Рашитов (Ўзбекистон)
Бу Рашитов учун фаолиятида жаҳон чемпионатларидаги илк медаль ҳисобланади.
У билан бир кунда даянга чиққан яна бир ўзбекистонлик спортчи Мадина Мирабзалова (57 кг) эса чорак финалгача етиб келди ва кучли саккизликда ўрин олди.
