Тошкент шаҳри Олмазор тумани ИИО профилактика инспектори, катта лейтенант Н.Бобомуротов 2022 йилнинг ноябрь ойида хизмат вазифасини бажараётган вақтида ўлдириб кетилган эди. Унинг қотилига нисбатан суд ҳукми ўқилди, деб хабар бермоқда Milliy TV телеканалининг Millar кўрсатуви.
Маълум қилинишича, муқаддам судланган, 1992 йилда туғилган судланувчи Б.З. шаръий никоҳида бўлган аёлини инспектордан рашк қилиб, уни ўлдирган. Ҳолат инспектор Олмазор туманининг «Ғалаба» маҳалласига тезкор чақирув бўйича етиб борганида юз берган.
Суд ҳужжатларига кўра, судланувчи пичоқни жабрланувчининг сон қисми ва кўкрак соҳасига урган. Воқеа пайти инспекторнинг олдида бўлган аёл — судланувчининг турмуш ўртоғи ҳолатни қуйидагича эслади:
«Ўлган одам ўзини инспектор деб таништирган, ўша куни формада эмас эди. Гаплашиб олайлик, деди. Ташқарига чиқиб, тинчликми десам, машинага ўтиринг, гаплашиб олайлик, деди. Машинасига чиқдим, ўтирдим. Хўжайиним бизни кузатаётганини кўрмадим. Хўжайиним машина эшигини очиб, бу ерда нима бўляпти, тушунмадим, деди. Кейин мен нотўғри тушуняпсиз, дедим. Улар уришиб кетди. Қонни кўриб, қочдим. Шунчаки рашк туфайли ўлдириб қўйди. Тўғрисини айтаман, менинг бу ерда ҳеч қанақа айбим йўқ. Инспекторга оилам ҳақида гапириб юргандим, шунинг учун олдига чиққандим. Юрадиган аёл эмасман. Ҳозир уч бола билан мен кўчада қолиб кетдим».
Инспекторнинг отаси судланувчига ўта оғир жазо берилишини сўраган. «Бу қолганларга ҳам ўрнак бўлсин», — дейди у. Судланувчи ҳам журналистларга интервью бераркан, воқеа ҳақида ўз фикрларини айтди.
«Lacetti автомобили аёлимнинг маҳалласига кириб кетаётганини кўриб қолдим. Кейин аёлим ўша машинага чиқиб, ўтириб кетди. Машинанинг орқасидан секин кузатиб бордим. Рулдаги одамга машинадан тушишини, кимлигини, аёлнинг эри эканимни айтдим. Бир-биримизга сўкиниб, уришиб кетдик. Қўлимда пичоғим бор эди. Пичоқни бир марта унинг сон қисмига тиқдим. Бақир-чақир бўлиб кетди. Соат кечаси 00:30 лар эди. Кейин пичоқни олиб кетдим», — деди у.
Судланувчи воқеа ҳақида тармоқларда тарқалаётган турли гап-сўзларга ҳам муносабат билдирди.
«Интернетда аёли билан уришибди, аёли 102 чақирибди, инспектор келибди ва уни эри пичоқлаб қўйибди, деган турли ёлғон хабарлар тарқаляпти менга нисбатан. Иккинчи пичоқни мен урмадим. Қарсак битта қўлдан чиқмайди. Ҳозир мен у оқ ёки бу қора демоқчи эмасман. У кўзини қисибди, бу ипини узибди. Мен бу воқеада ҳақиқий жабрланувчиман», — деди судланувчи.
Жиноят ишлари бўйича Олмазор тумани судида судланувчи Жиноят кодексининг 97-моддаси (Қасддан одам ўлдириш) 1-қисми, 112-моддаси (Ўлдириш ёки зўрлик ишлатиш билан қўрқитиш) 3-қисмида назарда тутилган жиноятларни содир этган деб топилди ва узил-кесил 14 йил 6 ой муддатга озодликдан маҳрум қилинди.
