Рамазон ҳайити муносабати билан барча ходимлар кетма-кет 3 кун дам олиши мумкин, дея хабар бермоқда президент ҳузуридаги Давлат хизматини ривожлантириш агентлиги матбуот хизмати.
Президент 2022 йил декабрь ойида 2023 йилда расмий саналарни нишонлаш даврида қўшимча ишланмайдиган кунларни белгилаш ва дам олиш кунларини кўчириш тўғрисидаги фармонни имзолаганди. Ҳужжатда ҳафтасига 6 кун ишлайдиганлар учун 24 апрель (душанба) қўшимча ишланмайдиган кун бўлиши белгиланган.
Шунинг билан ўзбекистонликлар кетма-кет 3 кун дам олиши мумкин:
- 22 апрель — шанба (ҳали расман тасдиқланмаган);
- 23 апрель — якшанба;
- 24 апрель — душанба (кўчирилган дам олиш).
5 кун ишловчилар учун душанба куни дам, 29 апрель — шанба эса иш куни бўлади.
Агар 22 апрель — шанба Ўзбекистон мусулмонлари идораси уламолари хулосаси асосида Рамазон ҳайитининг 1-куни сифатида белгиланса, 21 апрель — жума куни кундалик иш (смена) муддати барча ходимлар учун камида 1 соатга қисқартирилади.
