«Тошкент халқа автомобиль йўлларидан фойдаланиш участка бошқармаси» унитар корхонаси буюртмачилигида 31 март куни 2 та лот бўйича ўтказилган 3 млрд 220 млн сўмлик давлат харидида қонунбузилиш ҳолатларига йўл қўйилгани аниқланди. Бу ҳақда Коррупцияга қарши курашиш агентлиги хабар берди.
Қайд этилишича, жараёнда «Давлат харидлари тўғрисида»ги қонуннинг 10-моддаси (Рақобат ва холислик принципи), 14-моддаси (Манфаатлар тўқнашуви), 46-моддаси (Давлат харидлари жараёнидаги чекловлар) талаблари бузилган.
Хусусан, 2 та лот бўйича харидда иштирок этган 2 нафардан тадбиркорнинг ҳужжатлари харид комиссиясининг котиби фойдаланган компьютернинг IP-манзили орқали электрон платформага юкланган.
Шунингдек, ўтказилган ушбу давлат харидида харид комиссия раиси ва аъзоларининг иштирокисиз, бошқа шахс томонидан уларнинг электрон рақамли имзолари орқали харид натижалари баҳолангани ва имзолангани маълум бўлди.
Ҳолатлар бўйича 3 апрель куни харид комиссиясининг баённомасини бекор қилиш тўғрисида буюртмачига тақдимнома киритилган ва қонуний чора кўриш учун тўпланган ҳужжатлар Бош прокуратура ҳузуридаги Иқтисодий жиноятларга қарши курашиш департаментига юборилган. Ҳолат бўйича хизмат текшируви ўтказиш учун Автомобиль йўллари қўмитасига сўровнома киритилган.
Агентликнинг тақдимномасига биноан унитар корхона томонидан 4 апрель куни харид комиссиясининг баённомаси бекор қилинди.
Эслатиб ўтамиз, Антикоррупция агентлиги февралда давлат харидларида 25 млрд сўмлик қонунбузилиш ҳолатларини аниқлаганди. Хусусан, Uzbekistan Airports, «Ҳудудий электр тармоқлари» Хоразм филиали, Тошкент вилояти Болалар кўп тармоқли тиббиёт маркази қонунбузилишига йўл қўйган. Буюртмачиларга тақдимнома киритилган.
